डॉ. पूनावाला यांचा दुबईत सन्मान

पुणे - सिरम इन्स्टिट्यूट ऑफ इंडियाचे संस्थापक अध्यक्ष डॉ. सायरस पूनावाला यांना एशियन बिझनेस लीडरशिप फोरम (एबीएलएफ) तर्फे जीवनगौरव पुरस्काराने सन्मानित करण्यात आले आहे. प्रतिष्ठेचा हा पुरस्कार दुबई यूएईमध्ये आयोजित विशेष सोहळ्यात डॉ. पूनावाला यांना प्रदान करण्यात आला. 

जागतिक स्तरावर लसीकरण आणि त्या माध्यमातून रोगनिर्मूलन यासाठी सातत्याने कार्य करणाऱ्या आणि विविध स्तरांवर दिशादर्शक सामाजिक कार्य करणाऱ्या डॉ. पूनावाला यांच्या शिरपेचात हा सन्मान म्हणजे आणखी एक मानाचा तुरा ठरला आहे. सिरम इन्स्टिट्यूट ऑफ इंडिया ही भारतातील आघाडीची बायोटेक कंपनी असून, तिची स्थापना १९६६ साली झाली. ही कंपनी विविध आजारांवरील उपाय ठरणाऱ्या जीवरक्षक प्रतिबंधक लसींचे उत्पादन करणारी (डोसांच्या संख्येनुसार) जगातील सर्वांत मोठी कंपनी ठरली आहे. कंपनीने जगभरातील आर्थिकदृष्ट्या वंचित वर्गातील ४० दशलक्ष हून अधिक मुलांना जीवरक्षक लसी उपलब्ध करून दिल्या आहेत.

डॉ. पूनावाला यांना जून महिन्यात ऑक्‍सफर्ड विद्यापीठातर्फे प्रतिष्ठेची डॉक्‍टर ऑफ सायन्स ऑनरिस कौसा ही मानद पदवी प्रदान करण्यात आली.