Pune News : ईडीकडून माजी ग्रामविकास मंत्री हसन मुश्रीफ यांच्या मालमत्तांवर छापे

पुणे : राष्ट्रवादी काँग्रेसचे नेते आणि माजी ग्रामविकास व कामगार मंत्री हसन मुश्रीफ यांच्या पुण्यातील मालमत्तांवर सक्तवसुली अंमलबजावणी संचालनालयाने (ईडी) बुधवारी छापे टाकले. मुश्रीफ यांच्या कोल्हापूर आणि पुण्यातील मालमत्तांवर ईडीने बुधवारी सकाळी एकाचवेळी ही कारवाई केली.

मुश्रीफ यांच्या पुण्यातील कोरेगाव पार्क आणि बंडगार्डन येथील मालमत्तांवर छापे टाकून कागदपत्रांची तपासणी केली. तसेच, कोंढवा भागात मुश्रीफ यांचे नातेवाईक राहायला आहेत. तेथील अशोका मुज सोसायटीतही कारवाई करण्यात आल्याची माहिती सूत्रांनी दिली.

ईडीच्या या कारवाईनंतर राष्ट्रवादी काँग्रेसने ही कारवाई राजकीय द्वेषातून करण्यात आल्याची प्रतिक्रिया व्यक्त केली आहे. या कारवाईमुळे मुश्रीफ यांचे कार्यकर्ते आक्रमक झाल्याचे समजते. मात्र, मुश्रीफ यांनी कार्यकर्त्यांना संयम राखण्याचे आवाहन केले आहे.