निवडणुकीमुळे दिवाळीची सुटी लांबणीवर

शाळा, महाविद्यालयांच्या परीक्षांवर परिणाम; यंदा १३ दिवस शाळा बंद
पिंपरी - विधानसभा निवडणुकीचा परिणाम शाळा, महाविद्यालयांच्या परीक्षांवर झाला आहे. तसेच शिक्षकांच्या दिवाळीच्या सुटीवरही गदा आली आहे. मतदानाची तारीख २१ ऑक्‍टोबर असल्याने शिक्षक २२ ऑक्‍टोबरपर्यंत निवडणूक कामात व्यग्र असतील. त्यामुळे यंदा दिवाळीची सुटी २१ ऐवजी २३ ऑक्‍टोबरपासून लागू करण्यात आली आहे. विशेष म्हणजे आतापर्यंत सुमारे २० दिवस असलेली दिवाळीची सुटी यंदा तेरा दिवसच मिळणार आहे. त्यामुळे महिला शिक्षकांमध्ये नाराजी आहे.

२१ ऑक्‍टोबरपासून शाळांना सुटी देण्यात यावी, असा आदेश शिक्षण संचालनालयाने १२ एप्रिल २०१९ रोजी पत्राद्वारे काढला होता. मात्र, निवडणुकांमुळे २१ ऑक्‍टोबर रोजी सुटी देता येणार नाही, असे माध्यमिक विभागाचे शिक्षणाधिकारी डॉ. गणपत मोरे यांनी सांगितले. त्यामुळे २१ व २२ ऑक्‍टोबर रोजी सुटी दिल्यास दिवाळीची सुटी घेता येणार नाही. त्यामुळे सुटी २३ व २४ ऑक्‍टोबरनंतर देण्याची शिक्षकांची मागणी होती. अंशतः बदल करून ही सुटी २३ ऑक्‍टोबर ते ४ नोव्हेंबरपर्यंत लागू केली असून, ५ नोव्हेंबर रोजी शाळा नियमित सुरू होतील, अशी माहिती मोरे यांनी दिली. काही शाळांनी वेगवेगळ्या कारणांनी सुट्या कापून घेणे, राष्ट्रीय सणांच्या सुट्या नाकारणे, साप्ताहिक सुटीच्या दिवशी कामावर बोलावणे, असे प्रकार सुरू केले असल्याची माहिती डॉ. मोरे यांनी दिली.