शेतकऱ्याने लावला थेट काश्‍मीरला फोन आणि मिळवले लाखो रुपये 

नारायणगाव (पुणे) : जुन्नर तालुक्‍यातील हिवरेतर्फे नारायणगाव येथील शेतकरी अवधूत बारवे यांनी सुमारे 240 टन कलिंगडे श्रीनगर, जम्मू काश्‍मीर येथील बाजारपेठेत पाठवली. त्यामुळे या भागातील मुस्लिम बांधवांची लॉकडाउनमुळे रमझान सणानिमित्तच्या रोजासाठी निर्माण झालेली फळांची टंचाई निर्माण दूर झाली आहे. तसेच, बाजारपेठेअभावी कलिंगड पिकाचे बारवे यांचे होणारे लाखो रुपयांचे संभाव्य नुकसान टळले. 

पुणेकरांनो सावधान, कोरोनाच्या बळींचे झाले आहे शतक

प्रगतशील द्राक्ष उत्पादक बारवे यांनी द्राक्षाच्या रूट स्टॅक बागेत आंतरपीक म्हणून सात एकर क्षेत्रावर कलिंगड पिकाची लागवड केली होती. त्यासाठी त्यांना एकरी 50 हजार रुपये भांडवली खर्च झाला होता. मात्र, लॉकडाउनमुळे व्यापारी उपलब्ध नसल्याने तालुक्‍यातील बहुतेक शेतकऱ्यांच्या शेतमालाचे मागील महिन्यात कोट्यवधी रुपयांचे नुकसान झाले आहे. त्यामुळे बारवे हे चिंतेत होते. 

पुण्याच्या इतर बातम्या वाचण्यासाठी येथे क्लिक करा 

दरम्यान, रमझान सण सुरू झाल्याने व लॉकडाउन असल्याने श्रीनगर, जम्मू-काश्‍मीर भागात फळांची टंचाई असल्याची माहिती बारवे यांना समजली. त्यांनी जम्मू काश्‍मीर येथील व्यापाऱ्यांशी संपर्क साधला. चांगल्या दर्जाची कलिंगडे असल्याने प्रतिकिलो साडेसात रुपये या दराने कलिंगडे खरेदी करण्याची तयारी व्यापाऱ्यांनी दर्शवली. मागील आठ दिवसांत जम्मू काश्‍मीर येथील व्यापाऱ्यांनी त्यांच्या शेतातून सुमारे दोनशे चाळीस टन कलिंगडे खरेदी केली. कलिंगड विक्रीतून बारवे यांना सुमारे अठरा लाख रुपयांचे उत्पन्न मिळाले. 

कोरोना संकटामुळे सर्व व्यवहार बंद असताना शेतकरी सर्व देश बांधवांसाठी अन्नपुरवठा करत आहे. या प्रतिकूल परिस्थितीत प्रथमच तालुक्‍यातून शेतकऱ्याच्या बांधावरून थेट जम्मू काश्‍मीरला कलिंगडे रवाना झाली आहेत. त्यामुळे माझे संभाव्य नुकसान टळले असून, रमझान सणानिमित्त रोजासाठी कलिंगडे पुरवठा करण्याची संधी मिळाली. याची नोंद स्वतः मुख्यमंत्री उद्धव ठाकरे, माजी खासदार शिवाजीराव आढळराव पाटील, आमदार अतुल बेनके यांनी घेतली आहे. 
- अवधूत बारवे, शेतकरी