अवकाळी पावसामुळे शेतीची कामे रखडली; आंब्याचेही मोठं नुकसान

मुळशी तालुक्यात (Mulshi) पडत असलेल्या अवकाळी पावसामुळे (unseasonal rains) शेतीची मशागतीची कामे रखडली आहेत. तसेच जोरदार वारे वाहिल्यामुळे आंबे (Mango) पडून नुकसान झाले आहे. तालुक्यात गेली पंधरा दिवसात कधी गारांचा तर कधी जोरदार वारेसह अवकाळी पाऊस पडत आहे. तालुक्यातील पश्चिम भाग डोंगर उतारावर वसलेला आहे. पावसामुळे उतारावरील खाचरांत पाणी तुंबून ओल कायम राहत आहे. भात लावणी पूर्व शेतातील नांगरणी, बांधाना शिग देणे, रोपटे तयार करणे, जमिनीचे सपाटीकरण अशी मशागतीची कामे रखडली आहेत.

सध्या शेतीची कामे ट्रँक्टर, जेसिपी यांनी केली जातात. खाचरातून ट्रँक्टर जाऊ शकत नाही, खाचरे वाफस्यावर नसणे यामुळे शेतीची मशागत होऊ शकत नाही. मान्सून एक महिन्यावर आला आहे. त्यापूर्वी शेतीच्या मशागतीची कामे होण्यासाठी पाऊस उघडण्याची गरज आहे.

तसेच जोरदार वारे यामुळे मोठ्या प्रमाणावर झाडावरील आंबे पडून शेतकरींचे नुकसान झाले आहे. तसेच गारांच्यामुळे आंबा फळाचे नुकसान झाले आहे. यावर्षी मोहोर चांगला आला होता. त्यावेळी ढगाळ वातारण व पावसामुळे मोहोर मोठ्या प्रमाणावर गळून गेला होता. त्यातूनही आलेल्या फळांचे पावसाने सध्या नुकसान होत आहे. तालुक्यात आंब्याचे उत्पन्न शेतकरींना मोठा आर्थिक आधार आसतो.