गार्डन वडापावला विक्री थांबविण्याचे आदेश !

पुणे : प्रसिद्ध गार्डन वडापाव सेंटरवर अन्न व औषध प्रशासनाकडून (एफडीए) धडक कारवाई करत व्यवसाय बंद करण्याबाबत आदेश देण्यात आले आहे. 

पुण्यातील कॅम्प परिसरातील प्रसिद्ध गार्डन वडापाव सेंटरवर अन्न व औषध प्रशासनाकडून (एफडीए) सोमवारी रात्री धडक कारवाई करण्यात आली. अस्वच्छ कामगार आणि किडक्या बटाट्याच्या वापरामुळे एफडीएने ही कारवाई केली आहे. जनहित व जनआरोग्याच्या कारणास्तव विक्रीचा व्यवसाय तातडीने बंद करण्याबाबत आदेश दिल्याचे एफडीएतर्फे सांगण्यात आले आहे.

कॅम्प परिसरातील अख्तर केटरर्स व बागवान हॉटेलवरही एफडीएकडून कारवाई करण्यात आली. शहरात विनापरवाना, नोंदणीशिवाय हॉटेल, केटरर्स व वडापाव विक्री करणाऱ्यांवर एफडीएने कारवाईची मोहीम हाती घेतली आहे. गार्डन वडापावच्या बाबतीत स्पष्टपणे पावाच्या तपासणी अहवालाचा अभाव तसेच किडक्या बटाट्याचा वापर अशा कारणांचा समावेश आहे.

अन्न सुरक्षा व मानद कायदा 2006 अंतर्गत तरतुदीनुसार बंधनकारक आहे. या कायद्यात सांगितलेल्या तरतुदींचे उल्लंघन आढळून आल्यास अन्न व औषध प्रशासनातर्फे कारवाई केली जाते. 

ही कारवाई सहआयुक्त सुरेश देशमुख, सहायक आयुक्त संजय शिंदे, यांच्या मार्गदर्शनाखाली अन्न सुरक्षा अधिकारी रमाकांत कुलकर्णी व इम्रान हवालदार यांच्या पथकाने केली.