Sunil Bhagwat : आयसरच्या संचालकपदी प्रा. सुनील भागवत

पुणे : ज्येष्ठ रसायनशास्त्रज्ञ प्रा. सुनील भागवत यांची पुण्यातील भारतीय विज्ञान शिक्षण आणि संशोधन परिषदेच्या (आयसर पुणे) संचालकपदी नियुक्ती करण्यात आली आहे. राष्ट्रपंतींद्वारे ही निवड जाहीर करण्यात आली असून, मावळते संचालक प्रा. जयंत उदगावकर यांच्याकडून ते पदभार स्विकारतील.

प्रा. भागवत सध्या मुंबई येथील रसायन तंत्रज्ञान संस्थेत शैक्षणिक कार्यक्रमांचे प्राध्यापक आणि अधिष्ठाता आहेत. त्यांच्या नावावर अनेक उल्लेखनीय संशोधने आणि पेटंट आहेत. रसायन अभियंता म्हणून ओळखले जाणारे प्रा. भागवत यांचे संशोधन इंटरफेसियल विज्ञान आणि अभियांत्रिकी, उर्जा आणि ऊर्जा अभियांत्रिकी, संगणक प्रक्रिया सिम्युलेशन आणि कृत्रिम न्यूरल नेटवर्क या क्षेत्रांमध्ये आहे. ते एक लोकप्रिय शिक्षक आणि संशोधक आहे.

म्हणूनच त्यांना २०१६ मध्ये भारतीय राष्ट्रीय विज्ञान अकादमी (आयएनएसए) उत्कृष्ट शिक्षक पुरस्कारासह अनेक पुरस्कार मिळाले आहेत. २००६ मध्ये आयसर पुणे सुरू झाल्यापासून प्रा. भागवत हे तिसरे संचालक असतील. २०१७ पासून प्रा. जयंत उदगावकर संचालक पदाचा कार्यभार होता.

ऊर्जा अभियांत्रिकीत मोठे योगदान

प्रा. भागवत यांच्याकडे १२ पेक्षा जास्त पेटंट आहे. विशेष म्हणजे उर्जेचे थर्मोडायनामिक्स आणि ऊर्जा अभियांत्रिकीवर त्यांचा विशेष भर आहे. राष्ट्रीय आणि आंतरराष्ट्रीय शोधपत्रिकेत १०० हून अधिक शोधनिबंध प्रकाशित झाले आहेत.