लोहगाव येथे महापालिकेकडून अनधिकृत बांधकामावर हातोडा

रामवाडी ( पुणे ) : लोहगाव येथील संतनगर भागात शनिवारी अनधिकृतपणे बांधण्यात आलेल्या चार मजली इमारतीवर महापालिकेच्यावतीने जमीनदोस्त करण्यात आली. ही कारवाई महापालिकेचे कार्यकारी अभियंता रोहिदास गव्हाणे यांच्या मार्गदर्शनाखाली करण्यात आली.
 
हे ही वाचा : महापालिका आणि सोसायटीच्या वादात मात्र शेजारील बिल्डींगच्या नागरिकांना नाहक त्रास

संतनगर येथे शनिवारी कटरच्या सहाय्याने सुमारे साडे अकरा हजार स्केवर फूट अनधिकृत बांधकामावर कारवाई करण्यात आली. अनधिकृत बांधकामे करणाऱ्यांचे मात्र धाबे दणाणले आहेत. नगररोड भागात अनधिकृत बांधकामे मोठया प्रमाणात वाढत आहे. एकीकडे शहराचा नियोजनबद्ध विकास आणि स्मार्ट पुण्याच्या चर्चा फक्त होत असताना दुसऱ्या बाजूला अनधिकृत बांधकामावर वेळीच लक्ष न दिल्याने परिसरात कमी गुंठ्यामध्ये चार ते पाच मजली बिल्डिंगची  बांधकामे वाढू लागली आहे. अशी बांधकामे करताना महापालिकेची कायदेशीर परवानगी न घेता बांधकाम केली जात आहे. यामुळे स्वस्त दरात सदनिका घेणारे ग्राहक कोणतीही चौकशी न करता घर खरेदी करतात व फसवणुकीला बळी पडतात. 

हे ही वाचा : वाढदिवसाला आलेल्या महिलेसमोरच घडला प्रकार, महिलेशी अश्‍लिल वर्तन करीत केला विनयभंग 

यावेळी उपअभियंता किरण कलशेट्टी, कनिष्ठ अभियंता फारुख पटेल, दत्ता चव्हाण, निळकंठ शिलवंत यांच्या पथकाने एक जॉब कटर, ब्रेकर, जेसीबीच्या सहाय्याने कारवाई केली. यावेळी स्थानिक विमानतळ पोलिस ठाणे महापालिकेकडील मोठ्या प्रमाणात पोलिस बंदोबस्त तैनात करण्यात आला होता.  
 
शहर अभियंता प्रशांत वाघमारे म्हणाले, नागरिकांनी बांधकामे करताना महापालिकेची परवानगी घेऊनच बांधकामे करावीत. अनधिकृत बांधकामे केलेल्या इमारतीमध्ये फ्लॅट खरेदी करू नयेत. यापुढे अनधिकृत बांधकामावर सातत्याने कारवाई  केली जाईल.