‘एन ९५’ मास्क आता १९ ते ४९ रुपयांना; सरकारचे दरावर निर्बंध

पुणे : मास्कची किंमत निश्‍चित करून नागरिकांना ते माफक दरात मिळावेत म्हणून पुढाकार घेणारे महाराष्ट्र राज्य देशात अग्रेसर ठरले आहे. राज्यात आता ‘एन ९५' मास्क १९ ते ४९ रुपयांना मिळणार आहेत. दुहेरी आणि तिहेरी पदर असलेले मास्क ३ ते ४ रुपयांना मिळणार आहेत. मंगळवारी त्याबाबत राज्य सरकारने निर्णय जाहीर केल्याची माहिती आरोग्यमंत्री राजेश टोपे यांनी दिली.

दरम्यान, विविध दर्जाच्या मास्कची विहित केलेली अधिकतम विक्रीमूल्य मर्यादा साथरोग कायदा अंमलात असेपर्यंत लागू राहणार आहेत. कोरोना प्रतिबंधासाठी राज्य सरकार नागरिकांना मास्क आणि सॅनिटायझरचा वापर करण्याचे आवाहन करीत आहे. मास्क न वापरणाऱ्यांवर दंडात्मक कारवाईही करीत आहे. त्यामुळे मास्कच्या किमती सामान्यांना परवडणाऱ्या हव्यात म्हणून घेण्यात आलेल्या पुढाकाराला मुख्यमंत्री आणि उपमुख्यमंत्र्यांनी मान्यता दिल्याचे टोपे यांनी सांगितले.

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा
 

सॅनिटायझर व मास्कच्या किमतीत मोठी वाढ झाल्याने त्याचा भुर्दंड सामान्यांना भोगावा लागत असल्याचे निदर्शनास आले होते. त्यानुसार सॅनिटायझर व मास्कचे दर निश्‍चित करण्यासाठी समिती स्थापन करण्यात आली होती. समितीने दर निश्‍चित करण्यापूर्वी उत्पादक कंपन्यांशी चर्चा केली. उत्पादक, पुरवठादार व वितरकांचे उत्पादन क्षेत्र, कार्यालय आणि गोदामांना भेट दिली. त्यानंतर मास्कच्या किमती परिव्यय लेखा परीक्षकाच्या साहाय्याने निर्धारित करण्यात आली आहे.

नागरिकांना दिलासा
एन-९५ : १९ ते ४९ रुपये
दुहेरी व तिहेरी पदर : ३ ते ४ रुपये
कमाल विक्री किंमत दर्शनी भागावर लावणे बंधनकारक
रुग्णालयास कमाल विक्रीमूल्य मर्यादेच्या ७० टक्के दराने मास्क उपलब्ध
खासगी दवाखान्यातील रुग्णांकडून मास्कसाठी ११० टक्क्यांपेक्षा अधिक दर आकारता येणार नाही

फीसाठी अडवणूक कराल तर खबरदार; शाळांवर कडक कारवाईचे शिक्षणाधिकाऱ्यांनी दिले संकेत