Pune Rain News: पावसाचा लोंढा थेट दगडूशेठ मंदिरात, पाहा Video

पुणे : विजेच्या कडकडाटासह पडलेल्या मुसळधार पावसाने सोमवारी रात्री शहराला पुन्हा अक्षरशः बुडविले. आज दिवसभराच्या विश्रांतीनंतर रात्री विजेच्या कडकडाटासह पावसाने जोरदार हजेरी लावली. ढगफुटीसदृश्य पाऊस झाल्याने शहराच्या मध्यवर्ती भागात मोठ्या प्रमाणावर पाणी साचले होते. तसेच पुण्यातील प्रसिध्द श्रीमंत दगडुशेठ मंदिरात देखील पाणी शिरल्याचा प्रकार समोर आला.

दरम्यान मंडळाच्या कार्यकर्त्यांकडून मंदिरातील पाणी बाहेर काढण्यासाठी प्रयत्न सुरू होते. दगडू शेठ मंदिरासह श्रीमंत भाऊ रंगारी गणपती ट्रस्टच्या संग्रहालयात देखील पाणी शिरले.

पुणे शहरातील मध्यवर्थी भागात तसेच उपनगरांच्या परिसरात ढगफुटी झाल्याप्रमाणे पाऊस झाल्याने रस्त्यांना नदी-नाल्याचे स्वरूप आले होते. शहरातील अनेक रस्ते पाण्याखाली गेले होते. शहरात पावसाचा जोर इतका भयंकर होता की, सखल भागांमध्ये पाणी शिरल्याने अनेकांची तारांबळ उडाली. रात्री साडेनऊ ते साडेदहा या दोन तासांमध्ये ८१ मिलिमीटर पाऊस शिवाजीनगरमध्ये नोंदला गेला.

१२ किलोमीटरचा ढग

पुणे शहर आणि परिसरावर १२ किलोमीटर उंचीचा ढग रात्री असल्याची माहिती भारतीय हवामान खात्याचे शास्त्रज्ञ डॉ. अनुपम काश्यपी यांनी दिली. ते म्हणाले, ‘‘हा ढग रात्री पुण्यावर जात होता. तो ज्या भागातून पुढे सरकला त्या भागात मुसळधार सरी पडला.’’

का पडला मुसळधार पाऊस?

सकाळी उन्हाचा चटका वाढला. त्याच वेळी हवेतील बाष्पाचे प्रमाणही वाढले. त्यामुळे मोठ्या उंचीचे ढग शहर आणि परिसरात आले. त्यातून रात्री मुसळधार पाऊस पडला.