बायको नांदायला येत नसल्याने पतीने केले अनोखे आंदोलन

जुन्नर - गोद्रे ता. जुन्नर येथे माहेरी आलेल्या पत्नीने सासरी येण्यास नकार दिल्याने पती केशव काळे, रा. कुरकुंडी ता. संगमनेर या युवकाने थेट उंच टॉवरवर चढून आंदोलन केले.

आई-वडिलांकडे राहण्यास आलेली बायको नांदायला येत नाही यासाठी टॉवरवर चढून जोपर्यंत पत्नीला आणणार नाही तोपर्यंत खाली उतरणार नसल्याचे त्याने यावेळी उपस्थित ग्रामस्थांना सांगितले. त्याने दोरखंड ही सोबत नेला असल्याचे सांगण्यात आले. ही घटना आज शुक्रवार ता. १९ रोजी दुपारी घडली. यामुळे प्रशासनाची चांगलीच धावपळ उडाली अखेर पोलीस उपनिरीक्षक दिलीप पवार यांनी त्याच्या पत्नीला समोर आणून समझोता करण्याचे आवाहन केल्यानंतर सदर तरुण दीड तासानंतर टॉवर वरून खाली आला.

याबाबतची समजलेली माहिती अशी की, गोद्रे येथील तरुणीशी केशव याचा डिसेंबर २१ मध्ये कुरकुंडी-घारगाव येथे विवाह झाला होता. पती-पत्नी मध्ये होत असलेल्या वादामुळे त्याची पत्नी माहेरी राहण्यास आली. आज केशव पत्नीला घरी घेऊन जाण्यासाठी आला यावेळी पत्नीने सोबत येण्यास नकार दिल्याने तो थेट टॉवरवर चढला.

पिंपळगाव सिध्दनाथ व अलदरेचे पोलीस पाटील खंडागळे व सुमित लोहोटे यांनी पोलीसांना कळविले. बायको नांदायला येत नसल्याने त्याने वेगळीच शक्कल लढवून या आपली मागणी पूर्ण करण्यासाठी पिंपळगाव सिध्दनाथ येथील पेट्रोल पंपासमोर असणाऱ्या हाय व्होल्टेज टॉवरवर चढून बसला.

केशव काळे याच्या सासू सासाऱ्यांनी त्याने यापूर्वी गोद्रेच्या डोंगरावर चढून उडी मारण्याची धमकी दिली होती. त्याचे विरोधात आम्ही तक्रार अर्ज दिले असल्याचे रोहिदास भोजने यांनी सांगितले.