पौड (पुणे) : मुळशी तालुक्यात औद्योगिक कारखान्यांमध्ये आगीमुऴे होणारी दुर्घटना टाळण्यासाठी स्वंतत्र अग्निशमन केंद्र उभारले जाणार आहे. त्यासाठी पिरंगुट- उरवडे परिसरात सरकारी गायरान जागेची शोधाशोधही सुरू आहे. पुणे महानगर प्रदेश क्षेत्र विकास प्राधिकरणाच्या माध्यमातून या केंद्राची उभारणी होणार आहे. औद्योगिक कारखानदारांसाठी निश्चितच ही आनंदाची बातमी आहे.
मुळशी तालुक्यात पिरंगुट, उरवडे, कासारआंबोली, सुतारवाडी, घोटवडे, भरे, लवळे फाटा, पौड या परिसरात सुमारे पाचशेच्यावर छोटे मोठे औद्योगिक कारखाने आहेत. मुळशीतील स्थानिकांसह पुणे आणि पिंपरी चिंचवड परिसरातील हजारो कामगार या कारखान्यांमध्ये वेगवेगळ्या पदांवर कामाला आहेत. यापूर्वीही वेगवेगळ्या कारणांवरून कारखान्यांना आग लागण्याच्या घटना घडलेल्या आहेत. मात्र, आग विझविण्यासाठी पुण्यातून अग्निशमक दलाला बोलावले जायचे.
मात्र, अग्निशामक गाडी येईपर्यंत कारखान्यांचे अतोनात नुकसान व्हायचे. काही कारखाने तर अक्षरशः जळून खाक झाले आहेत. त्यामुळे तालुक्यात अग्निशमन केंद्र असावे, अशी मागणी यापूर्वी मुळशी इंडस्ट्रियल असोसिएशन व लोकप्रतिनिधींनी केली होती. याबाबत युवा सेना जिल्हाधिकारी अविनाश बलकवडे यांनी पुणे महानगर प्रदेश क्षेत्र विकास प्राधिकरणाकडे सातत्याने पाठपुरावा केला. त्यांच्या पाठपुराव्याला यश आले असून पीएमआरडीने येथे अग्निशमन केंद्रास मंजुरी दिली.
याबाबत पीएमआरडीचे अतिरिक्त आयुक्त प्रविणकुमार देवरे यांनी मुळशीचे तहसीलदार अभय चव्हाण यांना पत्र लिहून जागेची मागणी केली आहे. अग्निशमन केंद्रासाठी पिरंगुट- उरवडे परिसरात तीन ते चार हजार चौरस मीटर क्षेत्रफळाच्या भूखंडाची आवश्यकता आहे. तहसीलदार चव्हाण यांनीही लागलीच या परिसरात सरकारी गायरान जागेचा शोध सुरू केला आहे. या अग्निशमन केंद्रामुळे औद्योगिक कारखान्यास आग लागल्यास आगीवर लागलीच नियंत्रण मिळविणे शक्य होणार आहे.
मुळशी तालुक्यातील कारखानदारीवर हजारो कुटुंबांचा उदरनिर्वाह चालू आहे. कित्येक वर्षापासून वसलेल्या या औद्योगिक वसाहतीमध्ये मात्र अग्निशमन दलाची कमतरता होती. त्यामुळे दुर्दैवाने आग लागल्यास पुण्यातून अग्निशमक दलाची गाडी येईपर्यंत मोठे नुकसान होत होते. त्यामुळे तालुक्यासाठी स्वतंत्र केंद्र असावे, याबाबत पीएमआरडीकडे पाठपुरावा केला
होता.
- अविनाश बलकवडे, युवासेना जिल्हाधिकारीऔद्योगिक कारखान्यांमध्ये दुर्दैवाने आग लागल्यानंतर पुण्यातील अग्निशमन दलावर अवलंबून रहावे लागत होते. त्यामुळे तालुक्यासाठी स्वतंत्र अग्निशमन यत्रणेची आवश्यकता होती. ही खूप वर्षापासूनची आमची मागणी
होती.- सतीश करंजकर, अध्यक्ष, मुळशी इंडस्ट्रियल असोसिएशन
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.