विद्यार्थ्यांनी पक्ष्यांसाठी केली अन्न, पाणी, निवाऱ्याची व्यवस्था

जुन्नर - पुणे जिल्हा शिक्षण मंडळाच्या शिरोली बुद्रुक ता.जुन्नर येथील न्यू इंग्लिश स्कूल या शाळेतील विद्यार्थ्यांनी शालेय परिसरात वृक्ष लागवड केली आहे.  विद्यालयातील अनेक विद्यार्थ्यांनी राष्ट्रीय हरित सेनेत सहभाग घेऊन स्वच्छता, वृक्ष संवर्धन, गडकोट संरक्षण असे विविध उपक्रम यशस्वीपणे राबविले आहेत. त्यांना किर्लोस्कर फाऊंडेशनकडून पुरस्कारही देण्यात आला आहे. परिसरातील झाडे जोपासण्याची जबाबदारी या विद्यार्थ्यांनी हरितसेनेच्या माध्यमातून हाती घेतली आहे. शालेय परिसरात कोवळ्या पालवीने बहरलेली हिरवीगार झाडे आढळून येतात त्यामुळे येथे निरनिराळ्या पक्षांचा वावर वाढला आहे. उन्हाळ्याच्या दिवसात या पक्षांना अन्न,पाणी व निवारा उपलब्ध व्हावा या उद्देशाने हरित सेनेच्या विद्यार्थ्यांनी झाडांवर जागोजागी कागदी खोकी व प्लॅस्टीकच्या कॅनचा वापर करून राहण्यासाठी निवारा तसेच चा-यासाठी धान्याची व्यवस्था केली आहे. तसेच प्लॅस्टीकच्या रिकाम्या बाटल्या कापून त्यामध्ये पाणी भरून झाडांवर जागोजागी टांगून ठेवल्या आहेत. यामुळे शालेय परिसरात पक्षांचे प्रमाण वाढण्यास मदत झाली आहे.

तर निसर्गरम्य वातावरणात शिक्षण घेण्याचा आनंद विद्यार्थ्यांना मिळत आहे. या उपक्रमासाठी विद्यालयातील हरितसेनेचे मार्गदर्शक शिक्षक एस.व्ही.देवकुळे, व्ही.एस. भालींगे, साबळे, मनिषा खेडकर यांनी मार्गदर्शन केले असल्याचे मुख्याध्यापक दिलीप फापाळे यांनी सांगितले.