फोटो पाहून तुम्हीच सांगा, कोरोना का नाही मुक्काम वाढवणार? 

नारायणगाव (पुणे) : जुन्नर तालुक्यातील नारायाणगाव येथील बाजारपेठेत लॉकडाउन शिथिल केल्यानंतर खरेदीसाठी नागरिकांची झुंबड उडाली आहे. नागरिक व व्यापारी यांच्याकडून सोशल डिस्टन्सिंगचा वापर होत नसल्याचे दिसून येत आहे.

नारायाणगाव येथील पुणे- नाशिक महामार्गावर बसस्थानक चौकात मागील दिड महिन्यात आज प्रथमच वाहतुकीची कोंडी झाली होती. नागरिकांकडून सोशल डिस्टन्सिंगचा फज्जा उडत असल्याचे चित्र आज येथील बाजारपेठेतून दिसत होते. कोरोनाचे भय संपले अशा अविर्भावात नागरिक वागत असल्याचे दिसून येत आहे. 

आली रे आली...लाल परी आली...गावाला जायची सोय झाली...

जुन्नर तालुक्यातील नारायणगाव, वारूळवाडी ग्रामपंचायत, पोलिस स्टेशन, व्यापारी यांची संयुक्त बैठक घेऊन सोमवार ते शनिवारदरम्यान सकाळी आठ ते दुपारी दोन या वेळेत दुकाने उघडण्यास परवानगी दिली आहे. यामधून हॉटेल, पानटपरी, सलून, ब्युटी पार्लर, मिठाई दुकाने, बार व परमिट रूम वगळण्यात आले. ग्राहक व व्यापारी यांनी सोशल डिस्टन्सिंगचा वापर करावा. दुचाकीवर एकाच व्यक्तीने प्रवास करावा, मास्क व सॅनिटायझरचा वापर करावा, आदी सूचना सरपंच योगेश पाटे, सहायक पोलीस निरीक्षक अर्जुन घोडे पाटील यांनी केल्या होत्या. मात्र, या कडे दुर्लक्ष होत असल्याचे दिसुन येत होते. 

पुण्याच्या इतर बातम्या वाचण्यासाठी येथे क्लिक करा 

दुचाकीवरून दोन ते तीन व्यक्ती प्रवास करत होत्या. येथील बसस्थानक चौकात पोलिस बंदोबस्त ठेवण्यात आला आहे. मात्र, पोलिस दुर्लक्ष करत असल्याने दुचाकीस्वार सैराट झाले होते. एकूणच सद्य स्थिती पाहता नारायणगाव, वारूळवाडी ग्रामपंचायत व पोलिस स्टेशन यांच्या वतीने मागील दीड महिना घेतलेली मेहनत वाया जाते की काय, अशी शंका ज्येष्ठ नागरिक व्यक्त करत आहेत. 

फेरविचार करणार 
याबाबत सहायक पोलिस निरीक्षक अर्जुन घोडे पाटील म्हणाले की, नागरिक व व्यापारी यांनी घालून दिलेल्या अटीचे पालन न केल्यास लॉकडाउनचा फेरविचार केला जाईल. अत्यावश्यक सेवा वगळता सर्व व्यावसायिक दुकाने पुन्हा बंद करण्याचा निर्णय घेतला जाईल.