कात्रज घाटात बस पलटी

कात्रज : पुणे-सातारा महामार्गावर (Pune Satara Road) जुन्या कात्रज घाटातील भिलारेवाडी येथील एका तीव्र वळणावर बस पलटी (Bus Accident) झाल्याची घटना घडली. पहाटेच्या सुमारास १९ प्रवाशांना घेऊन जाणारी कर्नाटक पासिंगची बस चालकाचे नियंत्रण सुटल्याने हा अपघात घडला. यामध्ये चालकासह चार जण जखमी झाले. (Katraj Ghat Bus Accident)

मिळालेल्या माहितीनुसार, कर्नाटक राज्यातील हुबळी-शिर्डी (बस क्रमांक केए २५ एफ ३२४८) ही मंगळवारी पहाटे तीनच्या सुमारास भिलारेवाडी येथील के-७२ हॉटेल शेजारी असलेल्या वळणावर चालकाचे नियंत्रण सुटल्याने बस तीस फूट खाली खड्ड्यात कोसळली. या अपघातात बसची पलटी होऊन मोठे नुकसान झाले.

चालकासह चार प्रवाशी जखमी झाले. त्यानंतर स्थानिक नागरिक, भारती विद्यापीठ पोलिसांच्या मदतीने पोलीस उपनिरीक्षक रवींद्र गोडसे व कर्मचारी यांनी खाजगी रुग्णालयात उपचारासाठी दाखल केले. घटनेची माहिती मिळताच कात्रज अग्निशामक दलाने मदतकार्य करत प्रवाशांना बाहेर काढले. पुढील तपास भारती विद्यपीठ पोलीस करत आहेत.