आंदोलनामुळं पुणे-सातारा हायवेवरील वाहतूक मार्गात रविवारी बदल; कसा असेल मार्ग?

नसरापूर (पुणे) : खेड-शिवापूर टोल नाका हटाव आंदोलन उद्या (रविवार, ता. 16) होत आहे. या वेळी कायदा हातात घेणार नाही, टोल नाक्‍यावर वसुली होऊ न देता शांततेत भजन म्हणत आंदोलन सुरू होईल, प्रवाशांची अडवणूक होणार नाही, याची दक्षता घेतली जाईल, अशी माहिती कृती समितीच्या वतीने शनिवारी देण्यात आली. पण, या टोल विरोधी आंदोलनामुळं वाहतूक मार्गात बदल करण्यात आलाय.

ताज्या बातम्यांसाठी डाऊनलोड करा ई-सकाळचे ऍप

जिल्हाधिकाऱ्यांच्या बैठकीवर बहिष्कार 
या आंदोलनाच्या पार्श्वभूमीवर जिल्हाधिकाऱ्यांनी शुक्रवारी कृती समिती, लोकप्रतिनिधी, महामार्ग प्राधिकरण, रिलायन्स इन्फ्रा व पीएमआरडीए अधिकारी यांची बैठक आयोजित केली होती. त्यावर कृती समितीने बहिष्कार टाकला होता. टोल हटविणे हीच मागणी आहे व ती कायदेशीर आहे. इतर मलमपट्टी नकोय, त्यामुळे आम्ही या बैठकीस उपस्थित राहिलो नाही, अशी भूमिका कृती समितीने जाहीर केली आहे.

पुण्याच्या बातम्या वाचण्यासाठी येथे ►क्लिक करा 

प्रवाशांसाठी पर्यायी मार्ग 
खेड शिवापूर टोल नाक्‍यावर आंदोलन होत असल्याने सातारा बाजूकडून येणाऱ्या प्रवाशांना कापूरहोळ येथून सासवडमार्गे पुण्याकडे जाण्यासाठी रस्ता खुला करण्यात आला आहे, तर पुण्याकडून साताऱ्याकडे जाण्यासाठी कात्रज येथून सासवडमार्गे कापूरहोळ किंवा शिवापूर येथून कासुर्डी मरिआई घाटमार्गे सासवड व कापूरहोळ या पर्यायी मार्गाने जाता येऊ शकेल. 

आणखी वाचा - मुंबई-पुणे महामार्गावर धावणार पहिली इलेक्ट्रिक बस

टोल लेन वाढवणे, स्थानिकांना टोलमाफी देणे, या तात्पुरत्या मलमपट्टीवर आमचे समाधान होणार नाही. टोल हटवणे हीच प्रमुख मागणी आहे, त्यासाठीच हे आंदोलन आम्ही करत आहोत.
- माउली दारवटकर, निमंत्रक, टोल हटाव कृती समिती

कोणत्याही राजकीय पक्षाची घोषणा व झेंडा न घेता हातात काळा झेंडा घेऊन आंदोलक सहभागी होतील. पुण्याकडे जाणाऱ्या टोल बूथजवळील टोल कार्यालयानजीक आंदोलन होईल. आंदोलकांसाठी शिवराय मंगल कार्यालयात भोजन व्यवस्था आहे, पिण्याच्या पाण्याची व्यवस्था केली आहे. कोणतीही हुल्लडबाजी न करता प्रवासी, महिला, मुले, रुग्णवाहिकांना मदत केली जाईल. 
- दिलीप बाठे, निमंत्रक, टोल हटाव कृती समिती