esakal | पुणे : ठेवीदारांच्या केवायसींची ‘सीए’कडून छाननी होणार
sakal

बोलून बातमी शोधा

शिवाजीराव भोसले सहकारी बॅंक

पुणे : ठेवीदारांच्या केवायसींची ‘सीए’कडून छाननी होणार

sakal_logo
By
सकाळ वृत्तसेवा

पुणे : शिवाजीराव भोसले सहकारी बॅंकांमधील (shivajirav bhosale cooprative bank) खातेदार-ठेवीदारांच्या केवायसी अर्ज आणि त्यांच्या रकमांबाबत ठेव विमा महामंडळाच्या (DICGC) सनदी लेखापालाकडून येत्या आठवड्यात छाननी सुरू होणार आहे. ही प्रक्रिया पूर्ण होण्यास एक महिन्याचा कालावधी लागू शकतो. त्यानंतर ठेव विमा महामंडळाची कार्यवाही पूर्ण झाल्यानंतर ठेवीदारांना त्यांच्या रकमा ऑक्टोबरअखेर परत मिळण्याची शक्यता आहे.

शिवाजीराव भोसले बॅंकेमधील गैरव्यवहारामुळे रिझर्व्ह बॅंकेने ही बॅंक अवसायनात काढली. ठेव विमा महामंडळाच्या नियमानुसार बॅंकेमधील पाच लाख रुपयांपर्यंतच्या ठेवींना विमा संरक्षण आहे. ही रक्कम ठेवीदारांना परत करण्यासाठी त्यांच्याकडून केवायसी अर्ज भरून घेण्यात येत आहेत. बॅंकेकडे आत्तापर्यंत सुमारे १५ हजार खातेदार-ठेवीदारांचे केवायसी अर्ज प्राप्त झाले आहेत. याशिवाय काही ठेवीदारांचे केवायसी बॅंकेकडे आहेत. तसेच, केवायसी अर्ज यापुढेही बॅंकेत स्वीकारण्यात येणार आहेत. यापैकी बहुतांश अर्जांची ‘डीआयसीजीसी’कडून छाननी करण्यात येणार आहे. त्यामध्ये ठेवीदार, त्यांच्या ठेव रकमा, व्याजाची रक्कम अशा बाबी तपासण्यात येतील, अशी माहिती बॅंकेचे अवसायक डॉ. आर. एस. धोंडकर यांनी दिली.

व्याजासह पाच लाखांपर्यंतच्या ठेवी मिळणार

‘सीए’कडून लेखापरीक्षण झाल्यानंतर ही माहिती ‘डीआयसीजीसी’ला पाठविण्यात येईल. त्यानंतर आवश्यक प्रक्रिया पूर्ण करून ठेवीदारांच्या रकमा त्यांच्या अन्य बॅंक खात्यात ऑनलाइन जमा करण्यात येतील. ठेवीदारांना व्याजासह जास्तीत जास्त पाच लाख रुपयांपर्यंत रक्कम परत मिळणार आहे.

केवायसी अर्जासोबत कागदपत्रे (झेरॉक्स)

ठेव रकमेची पावती, आधार कार्ड, पॅन कार्ड, वीज बिल, इतर बॅंकेचा खाते क्रमांक, आयएफएससी कोड

बॅंकेची सद्यःस्थिती

  • शाखा १४

  • एकूण ठेवी ४३२ कोटी रुपये

  • ठेवीदार संख्या ७१ हजार ७७०

  • एक लाख रुपयांच्या आतील ठेवीदार : ६३ हजार ६५८

  • एक ते पाच लाख रुपयांपर्यंत ठेवीदार : ६ हजार ३००

  • पाच लाख रुपयांवरील ठेवीदार : १ हजार ८१२

ज्या ठेवीदारांनी केवायसीसह अर्ज अद्याप बॅंकेत जमा केलेले नाहीत, त्यांनी ते लवकर जमा करावेत. बॅंकेमार्फत आवश्यक प्रक्रिया जवळपास पूर्ण होत आली आहे. येत्या ऑक्टोबरअखेर ठेवीदारांना त्यांच्या रकमा परत करण्याबाबत प्रयत्न सुरू आहेत.

- डॉ. आर. एस. धोंडकर, अवसायक, शिवाजीराव भोसले बॅंक

loading image
go to top