Leopard : वडाच्या झाडावर केबलचा फास लागून अडकलेल्या बिबट्यास जीवदान

बेल्हे - गुळुंचवाडी (ता. जुन्नर) येथे आज (ता. ४) पहाटेच्या सुमारास वडाच्या झाडावर छेद असलेल्या केबल मध्ये फास लागून अडकलेल्या बिबट्यास वन कर्मचाऱ्यांनी बेशुद्ध करून झाडावरून खाली घेतले. दरम्यान या बिबट्याला माणिकडोह येथील बिबट्या निवारा केंद्रात हलविण्यात आले आहे.

याबाबत वनविभागाच्या सूत्रांकडून समजलेल्या माहितीनुसार, गुळुंचवाडी ( बेल्हे) येथे आज (ता. ४) पहाटेच्या सुमारास एका शेतातील वडाच्या झाडावर छेद असलेल्या केबल मध्ये फास लागून, बिबट्या अडकला असल्याचे ग्रामस्थांच्या निदर्शनास आले. याबाबत जुन्नर तालुका राष्ट्रवादी युवक काँग्रेसचे कार्याध्यक्ष अतुल भांबेरे यांनी वनविभागाला कल्पना दिली.

त्यानंतर जुन्नरचे सहाय्यक वनसंरक्षक अमित भिसे, ओतूर चे वनपरिक्षेत्र अधिकारी वैभव काकडे, वनपाल श्रीमती ढोबळे, माणिकडोह बिबट्या निवारा केंद्राचे पशुवैद्यकीय अधिकारी डॉ. चंदन सावणे, महेंद्र ढोरे आदीसह रेसक्यु टीम घटनस्थळी दाखल झाली. यावेळी बिबट्याला रेस्क्यु टीमच्या मदतीने बेशुद्ध करून, झाडावरून खाली घेण्यात आले. दरम्यान झाडावर चढताना केबलचा बिबट्याच्या कमरेला फास लागला असल्याचा अंदाज व्यक्त करण्यात येत आहे. दरम्यान स्थानिक ग्रामस्थांनी वनविभागाला सहकार्य केले. दरम्यान बिबट्याला पुढील उपचारासाठी माणिकडोह येथील बिबट्या निवारा केंद्रात हलविण्यात आले आहे.