Vidhan Sabha 2019 : तोफा आज थंडावणार

विधानसभा 2019 : पिंपरी - विधानसभा निवडणुकीच्या प्रचाराची सांगता शनिवारी (ता. १९) सायंकाळी सात वाजता होणार आहे. त्या पार्श्‍वभूमीवर शहरातील पिंपरी, चिंचवड, भोसरीसह लगतच्या मावळ मतदारसंघातील उमेदवार व त्यांच्या समर्थकांनी शुक्रवारी मतदारांच्या भेटीगाठींवर भर दिला. पदयात्रा, कोपरा सभा, बैठका घेतल्या. त्यामुळे वातावरण ढवळून निघाले.

विधानसभेसाठी सोमवारी (ता. २१) सकाळी सातपासून मतदानाला सुरवात होणार आहे. त्यापूर्वी ४८ तास अगोदर उमेदवारांना प्रचार थांबवावा लागतो. त्यानंतर प्रचार करताना किंवा मतदारांना कोणतेही आमिष दाखवताना उमेदवार अथवा त्यांचा कार्यकर्ता आढळल्यास आचारसंहिता भंगाचा गुन्हा होता. त्यामुळे प्रचारासाठी उरलेल्या काही तासांत अधिकाधिक मतदारांपर्यंत पोचण्याचा प्रयत्न उमेदवारांकडून सुरू आहे. चारही मतदारसंघांतील उमेदवार व त्यांच्या पक्षाच्या पदाधिकाऱ्यांनी शुक्रवारी स्वतंत्रपणे ठिकठिकाणी कोपरा सभा घेतल्या. पदयात्रा काढून मतदारांच्या भेटीगाठी घेतल्या. प्रचार पत्रकांचे वाटप केले. काहींनी वेगवेगळ्या समाजाचे मेळावे, बैठकी घेऊन पाठिंबा मिळविण्याचा प्रयत्न केला. सध्या काकडआरती सुरू आहे. शुक्रवारी नमाज अदा करण्यासाठी मशिदींमध्ये मुस्लिम बांधव मोठ्या संख्येने असतात, या पार्श्‍वभूमीवर काही उमेदवारांनी धार्मिक स्थळांच्या बाहेर थांबून तर काहींनी कंपन्यांच्या प्रवेशद्वारावर थांबून मतदारांना साकडे घातले.