मित्रानेच मारला दोन लाखांच्या दागिन्यांवर डल्ला; सीसीटीव्हीतून प्रकार उघड

लोणी काळभोर : घरामध्ये रोजच वावरणाऱ्या मित्राणेच हॉटेलवर जेवायला घेउन जाण्याच्या बहाण्याने निवृत्त शिक्षकाच्या घरी पाऊने दोन लाख रुपयांच्या दागिन्यांना गंडा घातल्याची घटना नुकतीच सीसीटीव्हीच्या माध्यमातून उघडकीस आली आहे. 

हेही वाचा - बेड नसल्याने ऑक्सिजन लावून जमिनीवर झोपलेत रूग्ण; पिंपरीत आरोग्यव्यवस्थेची दैना!

रवींद्र शेषराव अवधूत (वय- ४०, रा. आगळगाव, ता. बार्शी, जि. सोलापूर) असे चोरी करणाऱ्या आरोपीचे नाव आहे. लोणी काळभोर पोलिस ठाण्यात गुन्हा दाखल केला असता पोलिसांनी सदर आरोपीला त्याच्या मूळ गावातून ४८ तासात जेरबंद केले.

या प्रकरणी निवृत्त शिक्षक मोहन पंढरीनाथ ढोणे (वय- ६३, रा. मानस सरोवर सोसायटी, उरुळी कांचन, ता. हवेली) यांनी लोणी काळभोर पोलिसांत तक्रार दिली आहे.

पोलिसांनी दिलेल्या माहितीनुसार, आरोपी रवींद्र अवधूत हा मोहन ढोणे यांच्या परिचयाचा होता. ७ फेब्रुवारीला आरोपीने घरी येऊन मोहन व त्यांच्या पत्नीला उरुळी कांचन येथील एका हॉटेलमध्ये जेवायला घेऊन गेला होता. जेवायला बसल्यानंतर आरोपी रवींद्र याने तुम्ही या ठिकाणीच बसा मी माझ्या मुलांना जेवायला घेऊन येतो असे म्हणून हॉटेलमधून निघून गेला.

हॉटेलमधून निघून गेल्यानंतर आरोपी रवींद्र हा स्वतःच्या घरी न जाता मोहन ढोणे यांच्या घरी जाऊन त्यांच्या घराचा बंद दरवाजा एका डुप्लिकेट चावीच्या साहय्याने उघडून घरामध्ये प्रवेश केला. व घरामधील सोन्या चांदीचे पावणे दोन लाख रुपयांचे दागिने घेऊन त्या ठिकाणावरून परत मोहन ढोणे बसलेल्या हॉटेलमध्ये त्याच्या मुलांसह गेला. जेवण झाल्यानंतर रवींद्र अवधूत व मोहन ढोणे आपआपल्या घरी निघून गेले.

दरम्यान, मोहन ढोणे हे घरी गेले असता त्यांना घराचा दरवाजा उघडलेल्या स्वरूपात वाढळून आला. घरात जाऊन पाहणी केली असता कपाटात ठेवलेले पावणे दोन लाख रुपयांचे दागिने मिळून आले नाहीत. यावरून चोरी झाल्याचे निष्पन्न झाले. सोसायटीतील सीसीटीव्ही फुटेज तपासले असता रवींद्र हा डुप्लिकेट चावीच्या साहय्याने दरवाजा उघडून घरामध्ये प्रवेश केल्याचे आढळून आले.

- कोरोनाची त्सुनामी! २४ तासांत १.८५ लाख नवीन रुग्ण तर एक हजारपेक्षा जास्त जणांचा मृत्यू​

याप्रकरणी लोणी काळभोर पोलिस ठाण्यात रवींद्र याच्यावर गुन्हा दाखल केला असता रवींद्र याने चोरी केल्याचे कबूल केले. आरोपीला त्याच्या मूळगावातून अटक करण्यात आली आहे. तपास पोलीस उपनिरीक्षक सदाशिव गायकवाड करीत आहेत.

(संपादन : सागर डी. शेलार)