Maratha Reservation : सख्या मावस बंधूंचे अनोखे आंदोलन; एकाने केला चप्पलचा त्याग, तर दुसर्याने दाढी व डोक्याचे केस न काढण्याचा घेतला निर्णय

पारगाव - राज्यात गेली तीन ते चार महिन्यांपासून मराठा समाजाला आरक्षण मिळण्यासाठी सुरू असलेले मनोज जरांगे पाटील यांच्या आंदोलनाला संपूर्ण राज्यातुन पाठिंबा मिळत आहे. ग्रामीण भागात देखील मराठा तरुण मोठ्या संख्येने यात सहभागी होत आहेत.

आंबेगाव तालुक्यातील धामणी येथील दोन सख्खे मावस बंधू त्यापैकी रंगनाथ जाधव यांनी गेली तीन महिने पासुन चप्पलचा त्याग केला असून जो पर्यंत आम्हाला आरक्षण मिळणार नाही तो पर्यंत चप्पल घालणार नाही असा पण केला आहे.

तर त्यांचे मावस बंधू शांताराम जाधव यांनी देखील गेली चार महिन्यांपासून दाढी, डोक्याचे केस न काढून या आंदोलनाला पाठिंबा दिला असून जो पर्यंत आरक्षण मिळणार नाही, तोपर्यंत दाढी व डोक्याचे केस काढणार नसल्याचे त्यांनी सांगितले. रंगनाथ जाधव आणि शांताराम जाधव या दोन भावांनी अनोखे आंदोलन करून मराठा आंदोलनाला पाठिंबा दिला आहे.

त्यांच्या या अनोख्या आंदोलनाचे परिसरातून कौतुक होत असून त्यांच्या या प्रामाणिक आंदोलनाला लोक पाठिंबा देत आहेत. धामणी येथे सप्टेंबर महिण्यात झालेल्या साखळी उपोषणात देखील यांचा सक्रिय सहभाग होता. आजही त्यांनी आपला शब्द राखला असून जोवर आरक्षण मिळणार नाही तोवर हा त्याग कायम असेल असे त्यांनी सांगितले.

धामणी, शिरदाळे व पहाडदरा सकल मराठा समाजाच्या वतीने मनोज जरांगे-पाटील यांच्या आंदोलनाला पाठींबा देण्यासाठी जे आंदोलन केले होते त्यात या बांधवांचा मोठा सहभाग होता.

शिवाय साखळी उपोषणाच्या वेळी देखील यांनी एकदिवसीय लाक्षणिक उपोषण केले होते. तर पुणे जिल्ह्यात मनोज जरांगे पाटलांच्या सभेला हे दोन्ही भाऊ आवर्जून उपस्थित राहिले होते, असे मराठा आंदोलक मयुर सरडे यांनी सांगितले.