पुण्यात महावितरणचा अजब कारभार; वीजबिल भरूनही मीटर काढले

पुणे - महावितरणच्या अजब कारभाराचा फटका नऱ्हे येथील एका सोसायटीतील २४ ग्राहकांना बसला आहे. सर्व प्रक्रिया पूर्ण करून या सोसायटीतील ग्राहकांना वीजमीटर देण्यात आल्यानंतर दहा महिन्यांनी हे मीटर महावितरणच्या कर्मचाऱ्यांनी काढून नेले आहेत. थकबाकी नसताना मीटर काढण्याचे अधिकार महावितरणच्या कर्मचारी अथवा अधिकाऱ्यांना नसतानाही हे मीटर का आणि कसे काढून नेले, असा प्रश्‍न यामुळे निर्माण झाला आहे.

ताज्या बातम्यांसाठी डाऊनलोड करा ई-सकाळचे ऍप

नऱ्हे येथील सर्व्हे क्रमांक २३/ २ येथील सिद्धी गजराई कॉर्नर सोसायटीमध्ये हा प्रकार घडला आहे. धायरी येथील महावितरणच्या शाखेने हे मीटर काढून नेले आहेत. नवीन वीजजोड (वीजमीटर) देण्यासाठी महावितरणकडून एक कार्यपद्धती निश्‍चित करण्यात आली आहे. त्यानुसार विभागीय कार्यालयाच्या स्तरावर परवानाधारक विद्युत ठेकेदारामार्फत प्रस्ताव सादर करावा लागतो. प्रस्ताव दाखल झाल्यानंतर कार्यकारी अभियंता, अतिरिक्त कार्यकारी अभियंता आणि संबंधित विभागाचे शाखा अभियंता यांनी प्रत्यक्ष पाहणी करतात. वीजजोड देण्यासाठी आवश्‍यक कोणती यंत्रणा उभी करावी लागेल, याचा आढावा घेतला जातो. त्याचा अंदाज घेऊन अंदाजपत्रक तयार करून त्यास मान्यता दिली जाते. त्यानंतर प्रत्येक सदनिकाधारकांच्या नावाने ‘फर्म कोटेशन’ (एफक्‍यू) ऑनलाइन तयार केले जाते. संबंधित सदनिकाधारकाने पैसे भरल्यानंतर वीजजोड दिला जातो. 

हेही वाचा : ससून रुग्णालयात वर्षभरात दोन हजार दहा अर्भकांना जीवदान

ही सर्व प्रक्रिया पूर्ण करून नऱ्हे येथील सोसायटीतील २४ ग्राहकांना वीजमीटर देण्यात आले. दर महिन्याला या सोसायटीतील नागरिक वीजबिलही भरत आहेत. असे असताना अचानक महावितरणच्या अधिकाऱ्यांनी हे मीटर काढून नेण्यात आले. या प्रकाराबद्दल सोसायटीच्या नागरिकांनी महावितरणच्या कर्मचाऱ्यांपासून ते वरिष्ठ अधिकाऱ्यापर्यंत दाद मागतली. परंतु, मीटर काढून नेण्यामागचे कारण अद्यापही समोर आलेले नाही. याच परिसरात नियम धाब्यावर बसवून ट्रान्सफार्मरवरील क्षमतेपेक्षा अडीचपट भार मंजूर करण्याचा प्रकार ‘सकाळ’ने उघडकीस आणला आहे. असे असताना याच भागातील सोसायट्यांना महावितरणच्या त्रासाला समोरे जावे लागत असल्याचा आणखी एक प्रकार या निमित्ताने समोर आला आहे. 

हेही वाचा :  पुणे शहराचा पाणीपुरवठा राहणार सुरळीत

कोणतीही थकबाकी नसताना अचानक आमचे मीटर महावितरणच्या कर्मचाऱ्यांना काढून नेले. चौकशी केल्यानंतर दुसऱ्या सोसायटीच्या नावावरील मीटर आमच्या सोसायटीत बसविण्यात आले आहेत, असे सांगण्यात आले. सध्या सोसायटीला एकाच मीटरमधून वीजपुरवठा केला जात आहे.
- लक्ष्मीकांत त्रिपाठी, रहिवासी

थकबाकी असेल, तरच मीटर काढून नेता येतो. संबंधित सोसायटीतील नागरिकांनी माझी भेट घेतली होती. वीजमीटर मंजूर एका ठिकाणी करण्यात आले आणि प्रत्यक्षात ते दुसऱ्या ठिकाणी बसविले, असे प्रथमदर्शनी निदर्शनास आले आहे. याबाबत अधिक चौकशी करण्यात येईल. 
- प्रकाश राऊत, मुख्य अभियंता, रास्ता पेठ पुणे विभाग परिमंडळ