Police Recruitment : भाजीपाला व्यावसायिकाच्या मुलाची मुंबई पोलीस दलात झाली निवड

उरुळी कांचन - उरुळी कांचन (ता. हवेली) येथील भाजीपाला व्यावसायिक बाजीराव काळभोर यांचा मुलगा मनोज काळभोर याची मुंबई पोलीस दलात निवड झाली आहे. त्याने जिद्द व चिकाटीच्या जोरावर मुंबई पोलीस दलात दुसऱ्या प्रयत्नात यश संपादन केले आहे.

मनोज याचे प्राथमिक शिक्षण ज़िल्हा परिषद प्राथमिक शाळा, तर पाचवी ते बारावी पर्यंतचे शिक्षण महात्मा गांधी विद्यालय उरुळी कांचन येथे झाले. त्या नंतर त्याने लोणी काळभोर येथील समाजभूषण गणपतराव काळभोर महाविद्यालयातून अर्थशास्त्र या विषयात पदवी घेतली.

महाविद्यालयीन शिक्षण पूर्ण झाल्यानंतर मनोज पोलीस भरतीकडे वळला. २०२२ साली मनोजची मुंबई पोलीस दलात भरतीसाठी संधी केवळ एका गुणाने हुकली होती. या आलेल्या अपयशाने खचून न जाता मनोज पुन्हा स्पर्धा परीक्षेच्या तयारीला लागला.

त्याने बालाजीनगर येथील शिवचैतन्य अकॅडमीत स्पर्धा परीक्षेच्या अभ्यासासाठी प्रवेश घेतला. तर रात्रीच्या वेळी उरुळीतील ग्रंथालयात त्याने अभ्यास केला. तसेच मैदानी परीक्षेसाठी त्याने उरुळीतील महात्मा गांधी विद्यालयाच्या मैदानावर सराव सुरु ठेवला. त्याने केलेल्या मेहनतीला अखेर यश मिळाले.

मनोजचे वडील बाजीराव काळभोर यांची लोणी काळभोर येथे एक एकर शेती आहे. ते पुण्यातील मार्केटयार्ड येथे भाजीपाला व्यवसाय करतात तर त्याची आई कल्पना काळभोर या गृहिणी आहेत. मनोजला एक लहान भाऊ आहे. त्याने मिळवलेल्या या यशाचे परिसरात सर्वत्र कौतुक होत आहे.

मला २०२२ साली अपयश आले. फक्त एका मार्काने माझे मुंबई पोलीस दलात प्रतीक्षा यादीत माझे नाव गेले. यामुळे खूप वाईट वाटले. पण जिद्द सोडली नाही. पुन्हा नव्याने स्पर्धा परीक्षेत उतरलो. अखेर यात मला यश मिळाले. स्पर्धा परीक्षेसाठी पहिले सहा महिने अकॅडमीत प्रवेश घ्यावाच लागतो. तेव्हाच अभ्यासात सातत्य टिकून राहते. मैदानी चाचणीसाठी सकस संतुलित आहार खूप महत्वाचा असतो. स्पर्धा परीक्षेत संयम महत्वाची गोष्ट आहे. तरच यश मिळेल.

- मनोज काळभोर