Pune Mumbai expressway traffic
sakal
पुणे : मुंबई-पुणे एक्स्प्रेस वेवर मंगळवारी व बुधवारी झालेल्या तीव्र वाहतूक कोंडीमुळे वाहनांच्या लांबच लांब रांगा लागल्या होत्या. या कोंडीत अडकलेल्या शेकडो प्रवाशांना अनेक तास प्रतीक्षा करावी लागली. यामध्ये मोठ्या प्रमाणावर नोकरदार, व्यावसायिक आणि उद्योजक अडकून पडले. वेळेत अपेक्षित ठिकाणी पोहोचता न आल्याने त्यांच्या कामकाजावर थेट परिणाम झाला.
पुणे आणि मुंबईदरम्यान रोज कामानिमित्त ये-जा करणाऱ्यांची संख्या मोठी आहे. आयटी, उद्योग, व्यापार तसेच सेवा क्षेत्रातील अनेक कर्मचारी दररोज एक्स्प्रेस वेचा वापर करतात. मात्र अचानक झालेल्या वाहतूक कोंडीमुळे कार्यालयीन वेळापत्रक कोलमडले. अनेकांना महत्त्वाच्या बैठका रद्द कराव्या लागल्या, तर काहींना उशिरा कार्यालयात हजेरी लावावी लागली.