दारु पिल्यानंतर झालेल्या वादातून चाकूने गळा कापून खून

पुणे - दारु पिल्यानंतर झालेल्या वादतून दोघांनी एकाचा चाकूने गळा कापून खून केला. ही घटना घटना सोमवारी मध्यरात्री जिल्हा परिषदेच्या जुन्या इमारती समोरिल सार्वजनिक स्वच्छागृहासमोरील पदपथावर घडली.

संजय असे खून झालेल्या व्यक्तीचे नाव आहे. प्रभातकुमार कमलाकर म्हस्के (वय 36, रा. सोलापूर), निलेश बाळासाहेब भोसले (वय 25, रा. वेल्हे, शिवापूर) या दोघांना अटक केली आहे.

याबाबत पोलिस उपनिरीक्षक सुनिल रणदिवे यांनी फिर्याद दिली आहे. त्यानुसार दोघांच्या विरुद्ध गुन्हा दाखल करण्यात आला आहे.पोलिसांनी दिलेल्या माहितीनुसार, संजय, निलेश व प्रभातकुमार हे तिघे एकमेकांच्या ओळखीचे आहेत. तिघे मिळेल ती कामे करून फुटपाथवर राहतात. सोमवारी प्रभातकुमार याला केटरींगच्या कामाचे 1600 रुपये मिळाले होते. तिघांनी एकत्र येऊन रात्री दहा वाजता मद्यप्राशन केले.

संजय याने पुन्हा दारु पाजण्याचा आग्रह केल्यामुळे परत मद्यप्राशन केले. त्यानंतर तिघे रेल्वेस्थानकाकडे निघाले होते. संजय याने प्रभातकुमार याच्याकडे पैशाची मागणी केली. मात्र पैसे संपल्यामुळे त्याने पैसे देण्यास नकार दिला. त्यावेेळी त्यांच्यात वाद झाले. त्यातून दोघांनी संजय याच्या गळा आंबा कापण्याच्या छोट्या चाकूने कापला. खून केल्यानंतर आरोपींनी तेथून पळ काढला होता. घटनेची माहिती मिळताच पोलिसांनी घटनास्थळी धाव घेत तपासाला सुरूवात केली. खून झालेला व्यक्ती अज्ञात होता.

पोलिसांसमोर मृत व्यक्तीची ओळख पटविण्याबरोबरच आरोपींना अटक करण्याचे मोठे आव्हान होते. दरम्यान परिसरातील सीसीटीव्ही फुटेजची तपासणी केली असता, मृत व्यक्ती व दोघे आरोपी एकत्र जात असल्याचे दिसून आले. त्यानुसार वरिष्ठ पोलिस निरीक्षक विष्णू ताम्हाणे, गुन्हे निरीक्षक उल्हास कदम, सहायक निरीक्षक संदीप जोरे, कर्मचारी सुशिल लोणकर, संतोष काळे, निलेश साबळे, हेमंत पेरणे यांच्या पथकाने दोघांना विविध ठिकाणाहून ताब्यात घेतले. त्यांच्याकडे केलेल्या चौकशीत दारू पिल्यानंतर झालेल्या वादातून दोघांनी चाकूने गळा कापून खून केल्याची माहिती दिली.