सलून व्यवसायिकावर कुऱ्हाड व लोखंडी सत्तूरने वार करुन जीवे मारण्याचा प्रयत्न

वालचंदनगर - शेळगाव (ता. इंदापूर) येथे सलून व्यवसायिकावर (Salon Professional) कुऱ्हाड व लोखंडी सतूर वार करुन जीवे मारण्याचा प्रयत्न केल्याप्रकरणी वालचंदनगर पोलिसांनी (Police) तिघांजणावर गुन्हा (Crime) दाखल करुन अटक केली.

याप्रकरणी पोलिसांनी शरद रामा माने (वय ३५), दादा बाबुस माने (वय २८) व मल्हारी रोहिदास खोमणे (वय ३५, रा. सर्वजण शेळगाव) यांना अटक केली आहे. याप्रकरणी बापुराव शंकर राऊत (वय ४१) यांनी वालचंदनगर पोलिस ठाण्यात फिर्याद दिली आहे. पोलिसांनी दिलेल्या माहितीनूसार सोमवार (ता. २८) रोजी सकाळी अकरा वाजण्याच्या सुमारास बापुराव राऊत सलूनच्या दुकानामध्ये काम करीत असताना वरील तिघांनी अचानक कुऱ्हाड व लोखंडी सुऱ्याने राऊत यांच्या डोक्यात, कपाळावर, छातीवर, नाकावर व पायाच्या गुडघ्यावर वार जीवे मारण्याचा प्रयत्न केला.

तसेच, यापुढे दुकान चालविण्यासाठी महिन्याला एक हजार रुपये खंडणी मागून राऊत यांच्या खिशातील ५०० रुपये व दुकानातील गल्यातील ३०० रुपये असे ८०० रुपये घेवून पळून गेले. याप्रकरणी पोलिसांनी गुन्हा दाखल केला असून तिघांना तातडीने अट केली. तपास वालचंदनगर पोलिस ठाण्याचे साहय्यक पाेलिस निरीक्षक बिरप्पा लातुरे करीत आहेत.