निगडी उड्डाण पुलासाठी आठ महिने थांबा

पिंपरी - पुणे-मुंबई महामार्गावर निगडीतील भक्ती-शक्ती चौकात गेल्या दोन वर्षांपासून दुमजली बहुउद्देशील उड्डाण पुलाचे काम सुरू आहे. त्याच्या कामाची मुदत डिसेंबरमध्ये संपली. शहराच्या सौंदर्यात भर पाडणाऱ्या या पुलाचे आतापर्यंत ८० टक्के काम झाले आहे. ठेकेदाराला मुदतवाढ दिली असून, ऑगस्टपर्यंत उड्डाण पूल पूर्ण होईल, अशी शक्‍यता महापालिका अधिकाऱ्यांनी व्यक्त केली.

ताज्या बातम्यांसाठी डाऊनलोड करा ई-सकाळचे ऍप

निगडीतील भक्ती-शक्ती चौकातील वाहतूक कोंडी दूर करण्यासाठी दुमजली उड्डाण पूल उभारण्याचा आदेश २७ जून २०१७ रोजी महापालिकेने ठेकेदार बी. जी. शिर्के कंपनीला दिला. स्तुप कन्स्लटंट कंपनी सल्लागार आहे. 

विलंबाची कारणे
पुलाच्या कामासाठी पाणीपुरवठा व एमआयडीसीच्या जलवाहिन्या व विविध सेवावाहिन्या स्थलांतर करणे आवश्‍यक होते. त्यासाठी दोन्ही विभागांची परवानगी गरजेची होती. २०१९ च्या उन्हाळ्यात पाण्याची गरज असल्याने वाहिन्या स्थलांतरणास परवानगी मिळाली नव्हती. तसेच, निगडी पोलिस ठाणे ते त्रिवेणीनगर परिसरातून जाणाऱ्या उच्चदाब वाहिन्यांचे टॉवरही स्थलांतरीत करायचे होते. हे काम विद्युत विभागाने निविदा काढून केले. याला कालावधी लागल्याने पुलाला विलंब झाला. 

रस्ते विकासची परवानगी
भक्ती-शक्ती चौक ते देहूरोड मार्गाकडील उड्डाण पुलाचा भाग राज्य रस्ते विकास महामंडळाच्या हद्दीत येतो. तेथील उभारणीसाठी महामंडळाची परवानगी आवश्‍यक होती. ती मिळविण्यासाठी पुणे, मुंबईतील कार्यालयांसह दिल्लीतील राष्ट्रीय महामार्ग प्राधिकरण कार्यालयात पाठपुरावा करावा लागला. आता त्यांचे ना-हरकत प्रमाणपत्र 
मिळाले असल्याने कामाला गती मिळाली आहे.