पुणे-सोलापूर महामार्गावर चारचाकी गाडीच्या अपघातात एक ठार; तीन जखमी

कुरकुंभ - पुणे-सोलापूर राष्ट्रीय महामार्गावर कुरकुंभ (ता. दौंड) येथील औद्योगिक वसाहत कार्यालयासमोरील चौकात पुण्याकडून भरधाव जाणाऱ्या चारचाकी गाडीने दुभाजकाचे लोखंडी बॅरेगेट तोडून समोरील लेनवरून येणाऱ्या चारचाकी गाडीला जोरात धडक दिली. या भीषण अपघातात एका वृध्द व्यक्तीचा गंभीर जखमी झाल्याने मृत्यू झाला. तर आणखी तीन जण जखमी झाले. हा अपघात बुधवारी (ता. 25) दुपारच्या सुमारास घडला.

कुरकुंभ औद्योगिक वसाहतीच्या कार्यालयासमोरील पुणे-सोलापूर राष्ट्रीय महामार्गाच्या उतारावरून पुण्याकडून भरधाव वेगात जाणाऱ्या चारचाकी गाडीच्या (एमएच. 04, एचएम. 7906) चालकाचा ताबा सुटल्याने या गाडीने दुभाजकावरील लोखंडी बॅरेगेट तोडून समोरील लेनवरून पुण्याकडे जाणाऱ्या दुसर्‍या चारचाकी गाडीला (एमएच. 42, के. 7759 ) जोरात धडकून भीषण अपघात झाला.

या अपघातात रामदास किसन झगडे (वय 65, रा. सिद्धेश्वर निंबुडी, ता. बारामती, जि. पुणे) याचा गंभीर जखमी झाल्याने मृत्यू झाला. तर प्रमोद रामदास झगडे, सुरेखा रामदास झगडे, सुलेमान खुदबुद्दीन सय्यद हे तीन जण जखमी झाले. मयत रामदास झगडे हे तीघे जखमी झाले. धडक जोरात झाल्याने दोन्ही गाड्यांच्या पुढील बाजूचे मोठे नुकसान झाले. अपघात झाल्याचे समजताच ग्रामस्थांच्या मदतीने पोलिसांनी जखमींना उपचारासाठी पाटस येथील रूग्णालयात पाठवल्याची माहिती घटनास्थळीच्या ग्रामस्थांनी दिली. यासंदर्भात अजून पोलिसात गुन्हा दाखल झालेला नव्हता.