ओपन जिम, जॉगिंग ट्रॅक अद्याप बंदच 

नागरिकांमध्ये नाराजी; ट्रॅकवरील गवताच्या साम्राज्यामुळे व्यायाम करण्यास अडचण
सिंहगड रस्ता - कोरोनाच्या पार्श्वभूमीवर अनलॉकनंतर महापालिकेने उद्याने खुली केली. मात्र, ओपन जिम आणि जॉगिंग ट्रॅक अद्याप खुली केली नसल्याने नागरिकांमध्ये नाराजी आहे.

सिंहगड रस्त्यावर तुकाई माता उद्यान तसेच जॉगिंग ट्रॅक आहे. याच भागात दोन ठिकाणी ओपन जिम देखील आहे. मात्र त्या भागात कुलूप घातले आहे. त्यामुळे या उद्यानाचा नागरिकांना वापर करता येत नाही. उद्याने खुली करून एक महिना झाला मात्र उद्यानाचे प्रवेशद्वार अद्यापही बंदच आहेत. या सोबतच येथे वाढलेली झाडेझुडपे याचा जॉगिंग ट्रॅकवर चालण्यास येणाऱ्या नागरिकांना त्रास होतो. ट्रॅकवर कुत्र्यांचा वावर वाढला आहे. यासोबतच कचऱ्याचे साम्राज्य पसरले आहे. झाडांची छाटणी, वाढलेले गवत तसेच आहे. त्यामुळे फिरावयास येणाऱ्या नागरिकांमध्ये नाराजी व्यक्त केली जात आहे. तुकाई माता उद्यानाचे प्रवेशद्वारास कुलूप लावण्यात आले आहे.

- ताज्या बातम्यांसाठी डाऊनलोड करा ई-सकाळचे ऍप

परंतु तेथे जाण्यासाठी वाट करण्यात आली असून नागरिक कसरतीने उद्यानात प्रवेश करतात. उद्यानात देखील झाडे झुडपे वाढलेली आहेत. हिंगण्यातील जॉगिंग ट्रॅक मोठा असून येथे सकाळी आणि सायंकाळी मोठ्या प्रमाणात नागरिक फिरावयास येतात. परंतु वाढलेली झाडे, गवत तसेच कचरा, प्राण्यांची घाण यामुळे नागरिकांना चालताना अडथळे येतात. यावर तत्काळ कारवाई करावी. तसेच तुकाई माता विज्ञान आणि ओपन जिम तत्काळ सुरू करावेत अशी मागणी नागरिकांनी केली आहे.

- पुण्याच्या बातम्या वाचण्यासाठी येथे ► क्लिक करा

आमचा जिमचा ग्रुप आहे. आम्ही दररोज येथे फिरावयास येतो तसेच तुकाईमाता उद्यानात असलेल्या ओपन जिमच्या साहाय्याने व्यायाम करतो. मात्र, येथील प्रवेशद्वार उघडले नाही तसेच झाडे गवत मोठ्या प्रमाणात वाढले आहे. त्याचा त्रास होतो. त्यावर कारवाई होणे अपेक्षित आहे.
- अक्षय कोकरे, नागरिक, हिंगणे

आम्ही या परिसरात नियमित व्यायामासाठी येतो. सकाळी किमान दोन तास या परिसरात व्यायामासाठी असतो. परंतु कचरा, घाण, वाढलेली झाडेझुडपे, गवत यामुळे त्रास होत आहे. तसेच उद्यान खुले नसल्याने अडचण होत आहे. उद्यान खुले करावे.
- हमीद इनामदार, नागरिक, सिंहगड रस्ता 

हे उद्यान आणि जॉगिंग ट्रॅक जवळ असून, येथे फिरावयास जाता येते. परंतु, वाढलेली झाडे आणि अस्वच्छतेमुळे चालणे अवघड होते. तसेच, झाडे जास्त प्रमाणात वाढल्यामुळे सुरक्षेचा प्रश्‍नही उपस्थित होऊ शकतो. ट्रॅकवर वाढदिवस आदी साजरे केले जातात. त्याचा कचरा देखील येथे पडलेला असतो. त्यावर कारवाई होणे गरजेचे आहे.
- स्मिता कुलकर्णी, ज्येष्ठ नागरिक, हिंगणे

Edited By - Prashant Patil