संमेलनाध्यक्ष निवडीची प्रक्रिया चुकीची- लक्ष्मीकांत देशमुख

पुणे -आगामी साहित्य संमेलनाध्यांची निवड साहित्य महामंडळाचे १९ सदस्यच करणार आहेत. यामुळे ती वादग्रस्त ठरू शकते. यात मूठभरांच्या हाती अमर्याद अधिकार आल्याने अन्य साहित्यिकांचा सन्मान राखला जाणार नाही. यामुळे ही प्रक्रिया चुकीची आहे. त्यापेक्षा दरवर्षी पाच मान्यवर साहित्यिक व विचारवंतांची समिती नेमावी. तिच्या सदस्यांची नावे गुपित ठेवून त्यांनी एका साहित्यिकाची संमेलनाध्यक्ष म्हणून निवड करावी, असा प्रस्ताव अखिल भारतीय मराठी साहित्य संमेलनाचे अध्यक्ष लक्ष्मीकांत देशमुख यांनी साहित्य महामंडळाला पाठविला आहे. देशमुख यांनी पत्रकार परिषद घेऊन संमेलनाध्यक्ष निवड प्रक्रियेबाबत टीका केली. ते म्हणाले, ‘‘निवडणूक बंद करून सन्मानाने संमेलनाध्यक्षाची निवड करण्याची भूमिका महामंडळाने घेतली. मात्र यामुळे ही प्रक्रिया गुंतागुंतीची झाली आहे. यवतमाळ येथे २८ ऑक्‍टोबरला नव्या संमेलनाध्यक्षांची निवड होणार आहे. त्यापूर्वी महामंडळांचे सदस्य माझ्या प्रस्तावाचा विचार करून घटना दुरुस्ती करू शकतात.’’ 

घटक संस्थांकडून आलेल्या नावांपैकी एका नावावर महामंडळाच्या बैठकीत एकमत होणे अशक्‍य आहे. त्यातच एका साहित्यिकाचे नाव निश्‍चित झाल्यावर उर्वरित साहित्यिक पुन्हा आपले नाव सुचविण्यास नकार देतील. त्यापेक्षा पाच सदस्यांनी केलेली निवड ही वाड्‌.मयीन निकष लावून केलेली असावी, अशी अपेक्षाही देशमुख यांनी व्यक्त केली.

लैंगिक शोषण होते, हे सांगायलाही धारिष्ट्य लागते. परराष्ट्र राज्यमंत्री एम. जे. अकबर आणि लेखक चेतन भगत यांच्यावर लैंगिक शोषणाचे आरोप झाले आहेत. ‘मी टू’ चळवळीद्वारे महिला उघडपणे बोलू लागल्या आहेत. अकबर यांनी मंत्रिपदावर राहणेच मला मान्य नाही. जोपर्यंत त्यांचा राजीनामा घेतला जात नाही; तोपर्यंत मोदी सरकार स्त्रीपूजक नाही, असेच मी म्हणेन, हे मतही देशमुख यांनी व्यक्त केले.