पुण्यातील शिवाजीनगर येथील डेंगळे पुलाजवळ शनिवारी (२५ एप्रिल २०२६) सायंकाळी सुमारे ५.३० वाजता एका २० वर्षीय तरुणाने पीएमपीएमएल बस पळवून नेल्याचा धक्कादायक प्रकार घडला. आरोपीने बस डेंगळे पुलापासून जंगली महाराज रस्त्याने थेट गोखले चौकापर्यंत (गुडलक चौक) नेली. यावेळी तो भररस्त्यात चुकीच्या दिशेने सुसाट वेगाने बस चालवत असल्याने नागरिकांमध्ये एकच खळबळ उडाली होती. अखेर पोलिसांनी सिनेस्टाईल पाठलाग करून आरोपीला गोखले चौकाजवळ ताब्यात घेतले.