Pune Chandni Chowk Accident: चांदणी चौकातील दुभाजक रंगवणाऱ्या दोन कामगारांना कारने उडविले; पुलावरुन पडून जागीच मृत्यू

Pune Chandni Chowk Accident:

वारजे: मुंबई बंगळुरू बाह्यवळण महामार्गावर डुक्कर खिंडच्या पुढे असणाऱ्या उड्डाणपुलावर चांदणी चौकाच्या दिशेने जात असलेल्या भरधाव मोटारीने दुभाजकाला रंगरंगोटी करत असलेल्या दोन कामगारांना उडविले. हे दोन्ही कामगार उडून पुलाच्या खाली पडल्याने त्यांचा दुर्दैवी मृत्यू झाल्याची दुर्घटना वारजे येथे घडली.  यात कारमध्ये असलेले चौघे देखील जखमी झाले आहेत.

पोलिसांनी दिलेल्या माहितीनुसार सनी गौड  (वय २३ रा. सिद्धार्थ नगर युपी ) व विजय बहादुर मटरू चौहान (वय २८ रा. वाराणसी दोघेही सध्या रा .चिखली)  अशी मयतांची नावे आहेत. या प्रकरणी कारचालक बाळू महादेव शिंदे (वय ३४ रा. चिखली) याच्या विरुद्ध वारजे पोलीस ठाण्यात गुन्हा दाखल करण्यात आला आहे.

दुपारी साडेतीनच्या सुमारास  देशमुख कुटुंबीय नऱ्हे भागातून आपल्या घरी चिखली येथे जाण्यासाठी निघाले होते. त्यांची अल्टो कार डुक्कर खिंडीपासून पुढे असलेल्या उड्डाण पुलावर आली असताना भरधाव असलेली मोटारने रस्त्याच्या कडेला दुभाजकाला  रंगकाम करत असलेल्या दोन कामगारांना धडक दिली. (Latest Marathi News)

कामगार काम करत असलेल्या ठिकाण पासून सुमारे १५ - २० मीटर लांब बॅरिकेट लावले असूनही कारने पुलाच्या कठड्यांना डाव्या बाजूने घासत या कामगारांना उडवले. हे दोघे कारच्या बोनटवरून उडून पुलाच्या कठड्यावरून सुमारे ४० फूट खाली फेकले गेले. या दोघांना डोक्याला गंभीर इजा झाल्याने त्यांचा जागीच मृत्यू झाला, असावा अशी माहिती प्रत्यक्ष दर्शीनीने दिली. (Latest Pune News)