दिवाणजीला लुटणाऱ्या तिघांना २४ तासांत पोलिसांनी ठोकल्या बेड्या!

पुणे : मार्केटयार्डमधील व्यावसायिकाची रोकड बँकेत भरण्यासाठी निघालेल्या दिवाणजीला रॉडने हल्ला करत लुटणाऱ्या तिघांना पोलिसांनी २४ तासांत अटक केली आहे. 
गुन्हे शाखा, खंडणी व अंमली पदार्थविरोधी पथकाने ही कारवाई केली.

थापा उर्फ विकास गोविंद कांबळे (वय २१, रा. लोहियानगर), मयूर सुरेश जाधव (वय १९) आणि अक्षय रमेश नवले (वय १९, दोघे रा. जनता वसाहत) अशी अटक झालेल्यांची नावे आहेत. यातील कांबळे आणि नवले हे दोघे सराईत आहेत. चोरीची रोकड आणि दुचाकी असा तीन लाख ६३ हजारांचा मुद्देमाल आरोपींकडून जप्त करण्यात आला आहे. त्यांना पुढील तपासासाठी मार्केटयार्ड पोलिसांच्या ताब्यात दिले आहे.

- Big Breaking : सौरभ राव यांनी पुणे विभागीय आयुक्तपदाचा पदभार स्वीकारला​

याबाबत तेलाचे व्यापारी नहार यांच्याकडे दिवाणजी म्हणून नोकरीस असलेल्या सुमंतीलाल चंदनलाल ओस्तवाल (वय ६९, रा. गंगानगर, आकुर्डी प्राधिकरण) यांनी फिर्याद दिली. घटनेच्या आदल्या दिवशीही त्यांनी सापळा रचला होता. मात्र दिवाणजी पैसे भरण्यासाठी गेले नाहीत. त्यानंतर परत दुसऱ्या दिवशी तिघांनी सापळा रचला. त्यावेळी ते बॅगेत पैसे घेऊन निघालेले दिसले. वरिष्ठ निरीक्षक राजेंद्र मोहिते यांच्या सूचनेनुसार पोलिस उपनिरीक्षक दत्ताजी मोहिते, हवालदार उदय काळभोर आणि टीमने सापळा रचून तिघांना अटक केली.

- व्यापारी महासंघाच्या शिबिरात आढळले कोरोनाबाधित कर्मचारी!​

दिवाणजीवर पाळत ठेऊन साधला डाव : 
कांबळे दोन महिन्यांपूर्वी तेल घेण्यासाठी दिवाणजी कार्यरत असलेल्या दुकानात आला होता. त्यावेळी त्याने दिवसभराचा दुकानातील गल्ला पाहिला होता. दिवाणजी गल्ल्यातील पैसे बँकेत भरायला कधी जातात याची माहिती घेण्यासाठी आरोपींनी तीन दिवस त्यांच्यावर पाळत ठेवून रेकी केली. 

अशी मिळाली आरोपींची माहिती : 
गुन्ह्याच्या तपासादरम्यान सीसीटीव्ही फुटेज आणि तांत्रिक विश्‍लेषणाच्या आधारे आरोपींची ओळख पटली होती. पोलिस कर्मचारी रमेश चौधर यांना तिघे आरोपी रामटेकडी परिसरात असल्याची माहिती मिळाली. त्यानुसार त्यांना अटक करण्यात आली.

- पुण्याच्या बातम्या वाचण्यासाठी येथे ► क्लिक करा

(Edited by : Ashish N. Kadam)