Pune Crime : कामधंदा कर सांगितल्याने मुलाने केला वडिलांचा खून

विश्रांतवाडी : कामधंदा कर असे सतत सांगितल्याने मुलाने चिडून वडिलांचा खून केल्याची घटना आज पहाटे टिंगरेनगर येथे घडली. या घटनेत लक्ष्मण सुरेश मंजुळे (वय ५५ वर्षे रा. मास्टर कॉलनी, लेन न.१४-जे, टिंगरेनगर) यांचा खून त्यांचा मुलगा शिवनाथ लक्ष्मण मंजुळे याने कात्रीचे वार करून केला.

या प्रकरणी मुलाचे मामा बाबु रामू दांडेकर (वय ३६ वर्षे , व्यवसाय- मजुरी, रा. मास्टर काँलनी, लेन न. १४-जे, टिंगरेनगर) यांनी फिर्याद दिली आहे. पोलिसांनी दिलेल्या माहितीनुसार शिवनाथ मंजुळे हा काही कामधंदा करत नसल्याने वडील त्यास कामधंदा करीत चल व आंघोळ करत जा, चांगला रहात चल, असे नेहमी बोलत असल्याने त्यांच राग मनात धरून दि,. १८ रोजी पहाटे १.३० आरोपीने घरातील कैचीने वडील लक्ष्मण मंजुळे यांच्या छातीत व पोटात मारून ठार मारले.

तसेच आई त्यास सोडाविण्यासाठी गेली असता तिलासुद्धा हाताला कैचीने मारून जखमी केले आहे. त्यामुळे पोलिसांनी त्याला अटक केले आहे. त्याला कोर्टासमोर हजर करण्यात आले असून त्याच्या वर्तनातून तो मनोरुग्ण असल्याचा प्राथमिक अंदाज असून कोर्टाच्या आदेशानुसार त्याला ससून रुग्णालयात दाखल करण्यात आले आहे. अधिक तपास विश्रांवाडी पोलीस ठाण्याचे पोलीस निरीक्षक ( गुन्हे) भालचंद्र ढवळे करीत आहेत.