Pune : बाजारात लाल गुलाबाची चलती; व्हॅलेंटाइन डे' निमित्त मागणी

पुणे : 'व्हॅलेंटाइन डे'च्या निमित्त मार्केट यार्डातील फूल बाजारात विविध प्रकारच्या गुलाबांना मोठी मागणी वाढली आहे. आठवडाभरात मार्केट यार्डात सुमारे १० लाख गुलाबाची आवक झाली. मागील आठवड्याच्या तुलनेत गुलाबाच्या भावात ३०-४० टक्क्यांनी वाढ झाली आहे.

सोमवारी घाऊक फूल बाजारात दर्जानुसार गुलाबाच्या २० नगास २०० ते ३०० रुपये भाव मिळत असल्याची माहिती अखिल फूलबाजार अडते असोसिएशनचे अध्यक्ष अरुण वीर यांनी दिली. किरकोळ बाजारात एक फूल २० -३० रुपयांना मिळत आहे. १४ फेब्रुवारीला साजऱ्या होणाऱ्या ‘व्हॅलेंटाइन डे'ला एक आठवडा अगोदरपासूनच खरेदीदारांकडून मागणी सुरू असल्याचे त्यांनी सांगितले.

तळेगाव, मावळ, जातेगाव, शिरूर नगर याभागतून बाजारात गुलाबाची आवक होत आहे. तसेच नागपूर, सुरत, बडोदा, इंदूर, हैदराबाद, दिल्ली येथे फुलांना मोठ्या प्रमाणात मागणी आहे. 'व्हॅलेंटाइन डे'मुळे अनेक शेतकऱ्यांनी माल राखून ठेवला होता. यंदा शेतकऱ्यांना फुलांना चांगला भाव मिळाल्याने शेतकरी समाधानी असल्याचे वीर यांनी सांगितले.

सोशल मीडियाच्या जमान्यातही गुलाबाला मागणी

सध्या सोशल मीडियाचा जमाना आहे. त्यामुळे इमेज तसेच व्हिडिओद्वारे प्रेम व्यक्त करण्याचा ट्रेण्ड वाढत आहे. तरही बाजारात गुलाबाची मागणी जास्त आहे. अनेक तरुण-तरुणी सोशल मीडियावरून शुभेच्छा देण्यापेक्षा प्रत्यक्षात भेटून शुभेच्छा देत आहेत. त्यामुळेच मागील आठवड्याच्या तुलनेत बाजारात गुलाबंना मोठ्या प्रमाणावर मागणी वाढल्याचे प्रसिद्धी प्रमुख सागर भोसले यांनी सांगितले.

बाजारात लाल, पांढऱ्या, पिवळ्या व इतर रंगांच्या गुलाबांना मागणी आहे. मागिल वर्षीच्या तुलनेत यंदा मागणी जास्त आहे. पॉलिहाउसमध्ये उत्पादित होणाऱ्या गडद लाल रंगाच्या फुलांना परदेशात मागणी आहे. निर्यात संपल्यानंतर बाजारपेठेत फुलांचा पुरवठा सुरू होतो.

- अरुण वीर, अध्यक्ष, अखिल फूल अडते असोसिएशन