Pune Rain News: पुण्यात मुसळधार पाऊस! टेम्पोवर कोसळले वडाचे झाड; वाहतूक ठप्प

करिश्मा निकम

पुणे : आज पुण्यात मुसळधार पावसाने हजेरी लावली. यावेळी एक वडाचे झाड टेम्पोवर कोसळून दुर्घटना घडली आहे. या घटनेमध्ये कोणतीही जिवीतहानी झाली नसून टेम्पोचे नुकसान झाले आहे. ही घटना पुण्यातील सदाशिव पेठेत घडली आहे. या घटनेनंतर काही वेळेसाठी वाहतूक ठप्प झाली होती.

अधिक माहितीनुसार, मागच्या तीन ते चार दिवसांपासून पुणे आणि परिसरामध्ये पावसाने जोर धरला आहे. तर शुक्रवारी संततधार पावसामुळे सदाशिव पेठेतील उमाई अभ्यासिका जवळ असलेले अती प्राचीन वडाचे झाड कमकुवत झाल्यामुळे टेम्पोवर कोसळले.

झाडाखाली कुणीच नसल्यामुळे सुदैवाने या दुर्घनेत कुणालाच जखम झाली नाही. मात्र टेम्पोचे नुकसान झाले आहे. रस्त्याने जात असलेल्या एक दुचाकीस्वार या घटनेतून वाचल्याची माहिती समोर आली आहे.

दुचाकी पुढे गेल्यानंतर क्षणात हे झाड कोसळल्याने दुचाकीस्वार बचावला आहे. तर पावसाने कालपासून जोर धरल्याने कमकुवत झालेल्या मुळांनी माती सोडली आणि टेम्पोवरती कोसळले असं सांगण्यात येत आहे. दरम्यान, या घटनेनंतर काही वेळासाठी वाहतूक ठप्प झाली होती. महापालिकेच्या कर्मचाऱ्यांकडून झाड रस्त्यावरून हलवण्याचे काम सुरू आहे.