PMP : पुणे महापालिका पीएमपीला देणार २०० कोटी रुपये

पुणे - पुणे महानगर परिवहन महामंडळाच्या (पीएमपी) संचलनातील तूट भरून काढण्यासाठी २०० कोटी रुपये देण्यास स्थायी समितीने मंजुरी दिली आहे. अजूनही पुणे महापालिकेला २१७ कोटीची रक्कम पुढील काही महिन्यात द्यावी लागणार आहे.

पीएमपी कंपनी स्थापन होताना त्यामध्ये पीएमपीला होणारा तोटा भरून काढण्यासाठी पुणे महापालिकेने ६० टक्के तर पिंपरी चिंचवड महापालिकेने ४० टक्के भार उचलावा असा करार झालेला आहे. पीएमपीला २०२२-२३ या आर्थिक वर्षामध्ये ६९६ कोटी ५० लाख रुपयांची संचलनात तूट आली आहे.

त्यानुसार पुणे महापालिकेला ६० टक्के म्हणजे ४१७ कोटी ९० लाख रुपये पीएमपीला देणे आहे. त्यातील २०० कोटी रुपयांची पहिली उचल देण्याचा प्रस्ताव स्थायी समितीपुढे होता. त्यानुसार स्थायीने मंजुरी दिली.

पीएमपीला अजून २१७ कोटी रुपये पुणे महापालिकेने देणे असून, २०२३-२४ हे आर्थिक वर्ष संपण्यापूर्वी द्यावे लागणार आहेत.