पुणे महापालिकेने दिले दिव्यांग कर्मचाऱ्यांना ‘वर्क फ्रॉम होम’

पुणे : राज्य सरकारच्या आदेशानुसार दिव्यांग अधिकारी आणि कर्मचाऱ्यांना महापालिकेकडून ‘वर्क फ्रॉम होम’ची मुभा देण्यात आली आहे. मात्र, या कर्मचाऱ्यांनी महापालिका कार्यक्षेत्र सोडून जाऊ नये, आवश्यकता भासल्यास तत्काळ उपस्थित राहावे, या अटीवर ही मुभा देण्यात आली आहे.

कोरोनाचा संसर्ग मोठ्याप्रमाणावर वाढल्याने राज्यात लॉकडाउन लावण्यात आला आहे. लॉकडाउनमध्ये सरकारी कार्यालयातील उपस्थिती १५ टक्क्यांपर्यंत मर्यादित करण्यात आली आहे. मात्र, आरोग्य व महापालिका यंत्रणांना ५० टक्के व गरजेनुसार १०० टक्क्यांपर्यंत उपस्थित राहण्याचे निर्देश दिले आहेत. स्थानिक स्वराज्य संस्था व सरकारी कार्यालयांमध्ये दिव्यांग अधिकारी व कर्मचाऱ्यांची संख्या आहे. अशा व्यक्तींची रोग प्रतिकारक शक्ती सर्वसामान्यांच्या तुलनेत तितकीशी चांगली नसल्याने त्यांना अडचणींचा सामना करणे त्रासदायक होते. त्यामुळे राज्य सरकारने सर्व दिव्यांग अधिकारी व कर्मचाऱ्यांना कार्यालयात उपस्थित रहाण्यापासून सूट देऊन ‘वर्क फ्रॉम होम’ची मुभा देण्याचे आदेश दिले आहेत. त्यानुसार महापालिकेच्या अतिरिक्त आयुक्त रुबल अग्रवाल यांनी दिव्यांग अधिकारी व कर्मचाऱ्यांना वर्क फ्रॉम होमचे आदेश दिले आहेत.

पुण्याच्या ताज्या बातम्या वाचण्यासाठी येथे क्लिक करा