पुणे विभाग हागणदारीमुक्त

पाच जिल्ह्यांमध्ये ७ लाख ७४ हजार ८९८ स्वच्छतागृहे
पुणे - स्वच्छ भारत अभियानांतर्गत राज्यातील सर्व जिल्हे हागणदारीमुक्त करण्यासाठी योजना राबविण्यात येत आहे. त्यामध्ये सहा महसुली विभागांत पुणे विभाग शंभर टक्के हागणदारीमुक्त झाला आहे. पाच जिल्ह्यांमधील ५७ तालुक्‍यांत ५ हजार ६४५ गावांमध्ये ७ लाख ७४ हजार ८९८ स्वच्छतागृहे (शौचालये) बांधण्यात आली आहेत.

विभागीय आयुक्तालयाच्या आकडेवारीनुसार पुणे, सांगली, सातारा, कोल्हापूर आणि सोलापूरमध्ये मिळून ५७ तालुक्‍यांमध्ये वैयक्तिक स्वच्छतागृह बांधण्याचे काम २०१४-१५पासून सुरू होते; परंतु यामध्ये सोलापूर वगळता चार जिल्ह्यांमध्ये वैयक्तिक व सार्वजनिक स्वच्छतागृह बांधण्यात येत होते. ३१ डिसेंबरअखेर पाचही जिल्ह्यांमध्ये शंभर टक्के स्वच्छतागृह बांधण्याचे उद्दिष्ट पूर्ण झाले आहे. राज्यात शंभर टक्के स्वच्छतागृह बांधणारा विभाग म्हणून पुणे विभाग ओळखला जात आहे.