Bribe Case : लाच मागितल्याप्रकरणी पोलिस उपनिरीक्षकास अटक

पुणे - चालकाने परस्पर कर्नाटकात नेलेली मोटार परत मिळवून देण्यासाठी मोटारमालकाकडे ५० हजार रुपयांची लाच मागणाऱ्या पोलिस उपनिरीक्षकाला लाचलुचपत प्रतिबंधक (एसीबी) विभागाने अटक केली आहे. न्यायालयाने संबंधित उपनिरीक्षकास सोमवारपर्यंत (ता. १०) पोलिस कोठडीत ठेवण्याचे आदेश दिले आहेत.

शशिकांत नारायण पवार असे या पोलिस उपनिरीक्षकाचे नाव आहे. सध्या ते सिंहगड पोलिस ठाण्यातील अभिरुची पोलिस चौकीत नियुक्तीस आहेत. ‘एसीबी’चे पोलिस अधीक्षक अमोल तांबे यांनी दिलेल्या माहितीनुसार, तक्रारदार यांच्या मालकीची मोटार त्यांचा बदली चालक परस्पर घेऊन कर्नाटकात गेला होता. ही मोटार परत मिळवून देण्यासाठी मोटारमालकाने सिंहगड रोड पोलिस ठाण्यात तक्रार दिली होती. त्याची चौकशी शशिकांत पवार करीत होते.

मोटार परत मिळवून देण्यासाठी मोबदला म्हणून पवार यांनी मोटारमालकाकडे ५० हजार रुपयांची लाच मागितली. त्यावर मोटारमालकाने तडजोडीअंती २० हजार रुपये देण्याची तयारी दर्शविली. त्यानंतर मोटारमालकाने याबाबत लाचलुचपत प्रतिबंधक विभागाकडे तक्रार दिली. लाचलुचपत प्रतिबंधक विभागाच्या अधिकाऱ्यांनी तक्रारीची पडताळणी केली. त्यात लाचेची मागणी केल्यामुळे पोलिस उपनिरीक्षक पवार यांच्याविरुध्द गुन्हा दाखल केला आहे. पुढील तपास पोलिस उपअधीक्षक विजयमाला पवार करीत आहेत.

तीन दिवसांपूर्वीच हवालदाराविरुध्द गुन्हा

शेतकऱ्याचा ताब्यात घेतलेला ट्रॅक्टर सोडविण्यासाठी पोलिस हवालदार रामदास जाधव याने शेतकऱ्याकडे २० हजारांची लाचेची मागणी केली होती. याप्रकरणी भिगवण पोलिस ठाण्यात पोलिस हवालदाराविरुध्द गुन्हा दाखल केला आहे. हा प्रकार नुकताच तीन एप्रिल रोजी घडला होता. त्यानंतर तीन दिवसांतच पोलिस दलातील उपनिरीक्षकाने लाचेची मागणी केल्याचा प्रकार घडला.