पुणे रेल्वे स्थानकामध्ये सरकते जिने कार्यान्वित

पुणे - पुणे रेल्वे स्थानकावर प्रवाशांच्या सोयीसाठी दोन सरकते जिने (एक्‍सलेटर) नुकतेच कार्यान्वित झाले. रेल्वे स्थानकावर आणखी तीन सरकते जिने महिन्यात कार्यान्वित होणार आहेत.

राजा मोतीलाल बहादूर मिल रस्त्यावरून रेल्वे स्थानकात प्रवेश करताना प्रवाशांना चढण्यासाठी आणि उतरण्यासाठी या जिन्यांचा वापर करता येईल. प्लॅटफॉर्म क्रमांक ५ आणि ६ वर जाण्यासाठी तसेच तेथून बाहेर पडताना बहुतेक प्रवासी रेल्वे स्थानकाच्या मागील जिन्याचा वापर करतात. त्याच बाजूला दुचाकी आणि चार चाकी वाहनांचा तळ आहे. त्या मागील बाजूस असलेल्या प्रवेशद्वारवरून प्रवाशांची वर्दळ वाढली आहे. सध्या तेथून दररोज सुमारे ५०-६० हजार प्रवासी ये-जा करतात. त्यांच्यासाठी हे सरकते जिने उपयुक्त ठरतील, असे मध्य रेल्वेच्या पुणे विभागाकडून सांगण्यात आले. 

रेल्वे स्थानकावरील पादचारी पुलाला दोन्ही सरकते जिने जोडण्यात आले आहेत. आरक्षण केंद्राजवळही दोन सरकते जिने उभारण्याचे काम वेगाने सुरू आहे. या शिवाय प्लॅटफॉर्म क्रमांक दोन जवळही एक सरकता जिना उभारण्याचे काम रेल्वे प्रशासनाने सुरू केले आहे. 

हे तिन्ही सरकते जिने उभारण्याचे काम एप्रिलअखेरपर्यंत पूर्ण होणार आहे. वीजपुरवठा खंडित झाला तरी सरकते जिने सुरू राहण्यासाठी ‘जनरेटर’ची व्यवस्था केली आहे. त्यामुळे प्रवाशांची गैरसोय होणार नाही, असे रेल्वे प्रशासनाकडून सांगण्यात आले.

२ लाख - पुणे रेल्वे स्थानकातील प्रवाशांची दररोजची संख्या
२१८ - लोकलसह लांब पल्ल्यांच्या गाड्यांची संख्या