Pune Rain: पुण्यात मॉन्सूनला जोरदार सुरुवात; विजांच्या कडकडाटांसह पावसाची बॅटिंग, पुढील ३ तास सावधानतेचा इशारा

Pune Rain : पुणे शहर आणि जिल्ह्यात मॉन्सूनला जोरदार सुरुवात झाली आहे. शहर आणि परिसरात सध्या आभाळ भरुन आलं असून पुण्याच्या उत्तर-पश्चिम भागात ढगांच्या गडगडाटासह पावसानं हजेरी लावली आहे. सर्वत्र अंधारुन आलं असून गेल्या तापसभरापासून पाऊस चांगलाच बरसतो आहे, त्यामुळं दिवसभर काहीसा उकाडा जाणवत होता पण आता पावसानं हजेरी लावल्यानं हवेमध्ये गारवा निर्माण झाला आहे. (Pune Rain strong start of monsoon heavy rainfall in district with thunderbolts)

सिंहगड रस्त्यावर मोठी वाहतूक कोंडी

पुणे शहरातील पाषाण, बाणेर, औंध, सांगवी, पिंपरी-चिंचवड या भागात ढगांच्या गडगडाटासह पावसाला सुरुवात झाली. तसेच वारजे माळवाडी, कोथरुड या भागांसह घोरपडी, लोहगाव इथं पावसाच्या हलक्या सरी पडत आहेत. त्याचबरोबर सिंहगड रस्ता परिसरात जोरदार पावसाला सुरुवात झाली आहे. त्यामुळं धायरी फाट्यापासून पुण्याच्या दिशेला मोठी वाहतूक कोंडी झाल्याची माहिती सुत्रांनी दिली आहे.

दरम्यान, महाराष्ट्रात ६ जून रोजी मॉन्सूननं हजेरी लावली असून दोन दिवसांत अधुनमधून साधारण पाऊस कोसळत होता. पण आज पावसानं पुणे शहरांसह परिसरात चांगली हजेरी लावली. तसंच पुढील आठवड्याभरात पुण्यात पाऊस कसा असेल? याचा अंदाजही हवामान खात्यानं वर्तवला आहे.

आठवडाभर पुण्यात कसा असेल पाऊस

हवामान खात्याच्या माहितीनुसार, ९ ते १४ जून या काळात ढगाळ वातावरण राहणार असून साधारण पाऊस असणार आहे. यांपैकी उद्या ९ जूनला ढगांच्या गडगडाटासह पाऊस बरसण्याची शक्यता आहे. त्यांतर १२ ते १४ या तीन दिवसांच्या काळात दिवसातून दोन ते तीन वेळेस पाऊस बरसू शकतो असंही हवामान खात्यानं म्हटलं आहे.