Pune Crime : ससूनच्या इमारतीवरून पडल्याने विद्यार्थिनीचा मृत्यू

पुणे - ससून रुग्णालयातील इमारतीच्या छतावरून पडल्यामुळे एका विद्यार्थिनीचा मृत्यू झाल्याची घटना बुधवारी (ता. २९) घडली. ही तरुणी बी. जे. वैद्यकीय महाविद्यालयात शिक्षण घेत होती.

आदिती दलभंजन (वय २०, रा. सिंहगड रस्ता) असे मृत तरुणीचे नाव आहे. बी. जे. वैद्यकीय महाविद्यालयाचे अधिष्ठाता डॉ. संजीव ठाकूर यांनी दिलेल्या माहितीनुसार, आदिती ही एमबीबीएसच्या पहिल्या वर्षात शिकत होती. सकाळी साडेनऊ वाजण्याच्या सुमारास आदिती ससून रुग्णालयातील जुन्या इमारतीच्या छतावर गेली. तेथून खाली पडल्यामुळे डोक्याला मार लागल्याने ती गंभीर जखमी झाली होती.

आदितीला तातडीने उपचारासाठी आपत्कालीन विभागात हलविण्यात आले. सर्व स्पेशालिटी डॉक्टरकडून शर्थीचे प्रयत्न करण्यात आले. परंतु उपचारादरम्यान तिचा मृत्यू झाला. याप्रकरणी बंडगार्डन पोलिसांनी अकस्मात मृत्यूची नोंद केली आहे.

दरम्यान, बंडगार्डन पोलिस ठाण्याचे वरिष्ठ निरीक्षक संतोष पाटील, पोलिस निरीक्षक (गुन्हे) अश्विनी सातपुते यांनी घटनास्थळी भेट दिली. तिने नैराश्यातून आत्महत्या केल्याचा संशय पोलिसांना आहे. पोलिसांनी घटनास्थळावरून मोबाईल ताब्यात घेतला आहे.