शेतकरी, महिलांवरील अन्यायाच्या विरोधात रिपाइंची निदर्शने

पुणे - शेतकऱ्यांना आर्थिक मदत, पीडित महिलांना अर्थसाहाय्य, ॲट्रॉसिटी कायद्याची प्रभावी अंमलबजावणी, ओबीसींना आरक्षण, अनुसूचित जाती-जमातीमधील पदोन्नतीतील अनुशेष भरावा यासह विविध मागण्यांसाठी रिपब्लिकन पक्षाच्या (आठवले) वतीने बुधवारी जिल्हाधिकारी कार्यालयासमोर तीव्र निदर्शने करण्यात आली.

केंद्रीय सामाजिक न्याय राज्यमंत्री रामदास आठवले यांच्या आदेशानुसार राज्यभरात सरकारच्या विरोधात निषेध आंदोलन करण्यात आले. येथील जिल्हाधिकारी कार्यालयासमोर शहराध्यक्ष संजय सोनावणे यांच्या नेतृत्वाखाली आंदोलन करण्यात आले. प्रदेश सचिव बाळासाहेब जानराव, माजी उपमहापौर डॉ. सिद्धार्थ धेंडे, पश्चिम युवक आघाडीचे अध्यक्ष परशुराम वाडेकर, अशोक कांबळे, ॲड. मंदार जोशी, नगरसेविका हिमाली कांबळे, मोहन जगताप, शैलेंद्र चव्हाण, बसवराज गायकवाड, बाबूराव घाडगे, महिपाल वाघमारे, प्रदीप कांबळे, नीलेश आल्हाट, जयदेव रंधवे, शशिकला वाघमारे, मीना गालटे आदी कार्यकर्ते आंदोलनात सहभागी झाले होते.

ओल्या दुष्काळाने त्रस्त शेतकऱ्यांना एकरी ५० हजार रुपये मदत द्यावी. पीडित महिलांना ५० लाख रुपये मदत द्यावी. ॲट्रॉसिटी कायद्याची प्रभावी अंमलबजावणी करण्यात यावी. ओबीसी समाजाला राजकीय आरक्षण देण्यात यावे. महात्मा फुले, अण्णा भाऊ साठे आर्थिक विकास महामंडळास निधी उपलब्ध करून द्यावा. रेशनवरील निकृष्ट दर्जाच्या धान्याची चौकशी करण्यात यावी. अनुसूचित जाती-जमातीचा पदोन्नतीतील अनुशेष भरावा, अशा मागण्या या वेळी करण्यात आल्या.