गॅस एजन्सीच्या कामगाराकडूनच चौदा लाख रुपयांची रोकड लंपास

पुणे: बॅंकेत भरणा करण्यासाठी दिलेली लाख हजारांची रोकड चोरून पसार झालेल्या पर्वती भागातील एका गॅस एजन्सीतील कामगारावर गुन्हा दाखल करण्यात आला. हि घटना सोमवारी सकाळी पर्वती पायथा परिसरात घडली. याप्रकरणी कामगाराविरुद्ध गुन्हा दाखल करण्यात आला आहे.

गजेसिंह उमेदसिंह राठोड (वय 26, रा. अप्पर बिबवेवाडी) असे गुन्हा दाखल झालेल्या कामगाराचे नाव आहे. याप्रकरणी पर्वती येथील ढमढेरे गॅस एजन्सीचे मालक स्वप्नील ढमढेरे (वय 43, रा. विधी महाविद्यालय रस्ता) यांनी दत्तवाडी पोलिस ठाण्यात फिर्याद दिली आहे. ढमढेरे यांच्या गॅस एजन्सीचे कार्यालय पर्वती पायथा परिसरात आहे. त्यांच्याकडे मुळचा राजस्थान येथील असलेला गजेसिंह हा कामगार मागील पाच वर्षांपासून काम करीत आहे. एजन्सी कार्यालयातील कामांसह तो गॅस दुरूस्तीचीही कामे करतो.

त्यामुळे ढमढेरे यांनी सोमवारी सकाळी गजेसिंह यास 14 लाख 13 हजार 160 रुपये वडगाव बुद्रुक येथील एका बॅंकेत भरणा करण्यासाठी दिले होते. त्यानुसार, तो 14 लाखांची रोकड घेऊन गॅस एजन्सीच्या कार्यालयातून बाहेर पडला. त्यानंतर त्याने त्याच्याकडील रोकड बॅंकेत जमा न करता तो पळून गेला. कामगार कार्यालयात परत न आल्याने ढमढेरे यांनी त्याच्या मोबाईलवर संपर्क साधला. मात्र, त्याचा मोबाइल क्रमांक बंद लागला. त्यांनी सायंकाळपर्यंत त्याची वाट पाहिली, तरीही कामगार परत आला नाही. अखेर ढमढेरे यांनी पोलिस ठाणे गाठून फिर्याद दाखल केली. या प्रकरणाचा तपास पोलिस उपनिरीक्षक चंद्रकांत कामठे करीत आहेत.