पुणे - कोरोनाच्या छायेत तब्बल आठ महिन्यांनंतर जिल्ह्यातील काही शाळांची घंटा सोमवारी वाजली आणि इयत्ता नववी ते बारावीच्या विद्यार्थ्यांच्या हजेरीने शाळा पुन्हा भरल्या. मात्र कोरोनाचा संसर्ग पुन्हा वाढत असल्याने दुसऱ्या लाट येण्याच्या भीती पालकांच्या मनात कायम असल्याने त्याचे पडसाद शाळेत विद्यार्थ्यांच्या अल्पशा उपस्थितीतून समोर आले.
राज्यात २२ जिल्ह्यातील शाळा सोमवारपासून भरली आहे. पुणे आणि पिंपरी-चिंचवड महानगरपालिका क्षेत्र वगळता जिल्ह्यात अन्य ठिकाणी शाळा सुरू करण्याला प्रशासनाने हिरवा कंदील दाखविला. मात्र शिक्षकांची कोरोना तपासणी पूर्ण झालेल्या शाळा सुरू झाल्या आहेत. विद्यार्थ्यांमध्ये कोरोनाच्या संसर्गाची भीती असली तरी ऑनलाइन शिक्षणाऐवजी प्रत्यक्ष वर्गात बसून शिक्षण घेता येत असल्याचा आनंद दिसत आहे. विद्यार्थ्यांसमवेत पालकांची देखील शाळेबाहेर उपस्थिती असल्याचे पहायला मिळाले.
जिल्ह्यात सुमारे दोन हजार माध्यमिक व उच्च माध्यमिक शाळा आहे. त्यात सुमारे सहा लाख विद्यार्थी नववी ते बारावीचे शिक्षण घेत आहेत. पुणे, पिंपरी-चिंचवडमधील शाळा वगळता अन्य ग्रामीण भागातील शाळा सुरू करण्यात येईल, असे प्रशासनाने जाहीर केले होते. मात्र जिल्ह्यातील बहुतांश शाळांमधील शिक्षकांची कोरोना चाचणी अद्याप पूर्ण न झाल्याने अनेक शाळांचे प्रवेशद्वार आज उघडलेच नाही.
"जिल्ह्यात साडे अकरा हजार शिक्षक व शिक्षकेतर कर्मचारी आहेत. त्यातील जवळपास चार हजार सातशे जणांची कोरोना तपासणी झाली असून त्यात १३ जण कोरोनाबधित असल्याचे निदर्शनास आले आहे. या शिक्षक- कर्मचाऱ्यांची कोरोना तपासणी पॉजिटिव आली असली तरी त्यांच्यात कोणतेही लक्षणे नसल्याचे दिसून आले. जिल्ह्यातील जवळपास ४० ते ४५ टक्के शिक्षक- शिक्षकेतर कर्मचाऱ्यांची तपासणी पूर्ण झाली आहे. अद्यापही तपासणीची प्रकिया सुरू असल्याची माहिती माध्यमिक शिक्षण विभाग, जिल्हापरिषदेचे शिक्षण अधिकारी डॉक्टर गणपत मोरे यांनी दिली.
"सरकारने दिलेल्या आदेशाप्रमाणे शाळेची स्वच्छता आणि निर्जतुकीकरण करण्यात आले आहे. शाळेतील १० टक्के शिक्षकांची तपासणी झाली आहे. मात्र अद्याप शिक्षक आणि शिक्षकेतर कर्मचाऱ्यांची कोरोना तपासणी पूर्ण झालेली नाही. त्यामुळे आज शाळा सुरू करणे शक्य झाले नाही. ही चाचणी पूर्ण झाल्यानंतर शाळा सुरू करण्यात येईल."
- दिलीप पवार, मुख्याध्यापक, विद्या विकास मंदिर, निमगाव म्हाळूगी, (ता. शिरूर)
कोरोनाचं संकट असल्यानं सोशल डिस्टन्सिंग आणि इतर काळजी घेण्यासाठी शाळांनी शक्कल लढवली आहे. यात काही शाळांमध्ये एक दिवस विद्यार्थी आणि एक दिवस विद्यार्थीनी हजर राहणार आहेत. तर शाळांमध्ये सम-विषम हजेरी क्रमांक असलेल्या विद्यार्थ्यांना एक दिवसआड शाळेत उपस्थित राहण्यास सांगितलं आहे. तसंच काही शाळांनी निम्म्या विद्यार्थ्यांना प्रत्यक्ष वर्गात उपस्थित राहण्यास सांगितलं असून बाकीचे विद्यार्थी ऑनलाइन हजर राहतील.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.