पुणे : डम्परच्या धडकेत ज्येष्ठ महिलेचा मृत्यू; कोथरूड डेपोजवळची घटना

कोथरूड (पुणे) : डम्परच्या धडकेने शारदाबाई पंडित कांबळे (वय 63, रा. दत्तनगर, कात्रज) या ज्येष्ठ महिलेचा जागीच मृत्यू झाला. त्या भुसारी काॅलनीमध्ये पाच घरी घरकाम करायच्या. त्यांच्यामागे पती, दोन मुले, मुली आणि नातवंडे असा परिवार आहे. 

सर्व कामे आटोपून त्या घरी निघाल्या होत्या. कोथरूड डेपोजवळ रस्ता ओलांडत असताना भरधाव डम्परने त्यांना उडवले. अपघात झाल्यामुळे काही वेळासाठी या परिसरात वाहतूक कोंडी झाली होती. पोलिसांनी ताबडतोब घटनास्थळी धाव घेऊन वाहतूक कोंडी सोडवत परिस्थिती नियंत्रणात आणली. डम्पर चालकाला पोलिसांनी ताब्यात घेतले असून कोथरूड पोलिस अधिक तपास करीत आहेत. 

- चारचाकी टोइंग करून नेत असल्यानं तरुणांची सटकली; कर्मचाऱ्यांवर केली दगडफेक

अविनाश दंडवते म्हणाले की, कांबळे मावशी खूप वर्षांपासून आमच्या घरी काम करत होत्या. त्यांनी अतिशय कष्टातून संसार उभा केला होता. दोन वर्षांनी गावी जाऊन शेती करण्याचा त्यांचा मनोदय होता. त्यांच्या जाण्याने एक देवमाणूस आम्ही गमावला आहे.

गणेश वरपे म्हणाले की, या भागात वेगवान वाहनांमुळे रस्ता ओलांडणेसुद्धा कठीण असते. येथील वाहतूक प्रश्न सोडवण्यासाठी पोलिसांनी लक्ष घालणे आवश्यक आहे. सदरचा चालक नशेत होता का याची तपासणी करावी, अशी मागणी वरपे यांनी केली.

- पुणे : तनिष्क ज्वेलर्समधून महिलांनी 4 लाखाच्या सोन्याच्या बांगड्या केल्या लंपास!

108 चा असाही अनुभव 
अपघाताची घटना दिसताच सचिन धनकुडे यांनी 108 नंबरला फोन केला. तेव्हा अपघातग्रस्त व्यक्ती जिवंत आहे की, मृत अशी विचारणा करण्यात आली. 108 ची रुग्णवाहिका आली, परंतु अपघातग्रस्त महिला जागीच मृत झालेली असल्याने ते निघून गेले. नंतर शववाहिनी आली.

धनकुडे म्हणाले की, संबधित यंत्रणेला तातडीने कळवून मदतीची अपेक्षा सर्वसामान्य माणूस करतो, पण जेव्हा प्रतिप्रश्न विचारले जातात तेव्हा तो अचंबित होतो.

- पुण्यातील इतर बातम्या वाचण्यासाठी क्लिक करा

(Edited by: Ashish N. Kadam)