शरजील उस्मानी दुसऱ्यांदा स्वारगेट पोलिस ठाण्यात

पुणे - अलीगढ मुस्लिम युनिव्हर्सिटीचा विद्यार्थी शरजील उस्मानी दुसऱ्यांदा पुणे पोलिसांसमोर हजर झाला. एल्गार परिषदेत वादग्रस्त वक्तव्य केल्याप्रकरणी त्याचा जबाब नोंदवण्यात आला. पुण्यात 30 जानेवारीला एल्गार परिषद झाली होती तेव्हा हिंदू धर्माबाबत शरजीलने वादग्रस्त वक्तव्य केलं होतं. या प्रकरणी त्याच्याविरोधात गुन्हा नोंद करण्यात आला आहे.  

शरजील उस्मानीने याआधी 10 मार्चला पुणे शहर पोलिसात त्याचा जबाब नोंदवला होता. गुरुवारी शरजील पुन्हा स्वारगेट पोलिस स्टेशनला आला होता. तिथं त्याच्या भाषणाविरोधात गुन्हा दाखल असून पोलिसांनी जबाब नोंदवून घेतला अशी माहिती पोलिस अधिकाऱ्यांनी दिली. पोलिस उपायुक्त सागर पाटील यांनी सांगितलं की, उस्मानीने पुन्हा एकदा त्याचा जबाब दिला आहे. उच्च न्यायालयाच्या आदेशानुसार हा जबाब घेण्यात आला. 

पुण्यातील इतर बातम्या वाचण्यासाठी क्लिक करा

उस्मानी याने गणेश कला क्रीडा रंगमंच येथे पार पडलेल्या एल्गार या परिषदेत हिंदू धर्माविषयी वादग्रस्त वक्तव्य केले होते. त्यावरून भारतीय जनता पार्टी राज्यातील काही संघटनांनी या मुद्यावर आंदोलने करून उस्मानीच्या अटकेची मागणी केली होती. उस्मानी यावर भावना भडकावल्याप्रकरणी (भादंवि कलम 153 ए) स्वारगेट पोलिस ठाण्यात गुन्हा दाखल करण्यात होता. एल्गार परिषदेच्या कार्यक्रमाला लेखिका अरुंधती रॉय, निवृत्त न्यायाधीश बीजी कोळसे पाटील आणि माजी आयपीएस अधिकारी ए एम मुश्रीफ यांच्यासह इतर मान्यवर उपस्थित होते. भाजपच्या भारतीय जनता युवा मोर्चाचे स्थानिक नेते प्रदीप गावडे यांनी त्याच्या विरोधात तक्रार दाखल केली होती.

हे वाचा - कोरोना फोफावतोय, स्वॅब दिलेल्यांना घरी सोडू नका; नागरिकांकडून मागणी

सोमवारी या प्रकरणी उच्च न्यायालयात सुनावणी झाली. यावेळी महाराष्ट्र सरकारने असं म्हटलं की, शरजील जर पुणे पोलिसांसमोर हजर झाला आणि तपासात सहकार्य केलं तर त्याच्या विरोधात कठोर कारवाई केली जाणार नाही. राज्य सरकारच्या वतीने वाय पी याज्ञिक यांनी न्यायालयात सांगितलं की, उस्मानीला सीआरपीसीच्या कलम 41 ए अंतर्गत नोटीस पाठवण्यात आली होती आणि जोपर्यंत उस्मानी पोलिसांना सहकार्य करेल तोपर्यंत पोलिस या कलमानुसार असलेल्या प्रक्रियेचं पालन करतील.