नव्या पिढीवर जबाबदारी टाकावी - श्रीकृष्ण चितळे

पुणे - उद्योग उभारताना आणि वाढविताना अनेक अडचणी येतात. त्यामुळे व्यवसायात जोखीम घेण्याची तयारी असायला हवी. नव्या पिढीवर विश्वास टाकून, त्यांच्यावर जबाबदारी सोपवली, तर तेही जिद्दीने आणि मेहनतीने व्यवसाय वाढविण्यासाठी प्रयत्न करतात. एखाद्या मुलाच्या मनात व्यवसाय करण्याचा विचार आला, तर पालकांनी त्याला पाठबळ द्यायला हवे, असे मत उद्योजक श्रीकृष्ण चितळे यांनी व्यक्त केले.

शुक्‍ल यजुर्वेदिय माध्यंदिन महाराष्ट्रीय ब्राह्मण मध्यवर्ती मंडळाच्या याज्ञवल्क्‍य उद्योजक विकास अभियानाचा (युवा) वर्धापन दिन साजरा करण्यात आला. या निमित्त चंद्रकांत जोशी यांच्या स्मरणार्थ दिला जाणारा ‘युवा उद्योजक’ पुरस्कार भृंगराज तेल कंपनीचे गणेश आणि केदार कुलकर्णी यांना; तर सृजन आर्ट गॅलरीपुरस्कृत ‘सृजन युवा’ पुरस्कार गायिका बेला शेंडे यांना चितळे यांच्या हस्ते प्रदान करण्यात आला. राजन कुलकर्णी व शौनक पानसे यांना युवा उत्कर्ष पुरस्काराने, तर नारायण पेठेतील आपली राहती वास्तू देणगीस्वरूपात देणाऱ्या डॉ. अनिल गांधी यांचा सपत्नीक सत्कार करण्यात आला. याप्रसंगी संस्थेचे अध्यक्ष उमाकांत जोशी, विश्राम कुलकर्णी, डॉ. संजय जोशी, ‘युवा’चे श्रीकांत जोशी, सृजन आर्ट गॅलरीचे चारुहास पंडित, मंजूषा वैद्य, तृप्ती नानल, मिलिंद दार्वेकर उपस्थित होते.

बेला शेंडे म्हणाल्या, ‘‘गायनाचा वारसा असला तरी मेहनत आणि रियाज महत्त्वाचा आहे. करिअरमध्ये चढ-उतार आले तरी तुम्ही सामोरे कसे जाता, यावर यश अवलंबून असते. प्रत्येक गाणे नवे आव्हान असते. त्यासाठी सतत सराव करते.’