माओवादी संबंध प्रकरणी क्लोन कॉपीसाठी जाणार सहा महिन्यांचा कालावधी 

पुणे : माओवादी संघटनेशी संबंध असल्याच्या आरोपावरून अटक करण्यात आरोपींना क्लोन कॉपी मिळण्यासाठी किमान सहा महिन्यांचा कालावधी जाणार आहे.

क्लोनिंग करण्याची कार्यपध्दती वेळखाऊ असून या खटल्यातील नऊपैकी केवळ दोन आरोपींनाच क्लोन कॉपी मिळाली आहे. उर्वरीत आरोपींना क्लोन कॉपी मिळण्याकरिता किमान सहा महिन्यांचा कालावधी लागेल, अशी माहिती बचाव पक्षाचे वकिल राहुल देशमुख यांनी दिली.

सुनावणी असल्यामुळे आरोपींना गुरुवारी न्यायालयात हजर करण्यात आले होते. त्यावेळी इंनकॅमेरा क्लोन कॉपी देण्यात आली. या प्रकरणातील 9 आरोपींनी आपल्याला क्लोन कॉपी मिळावी, अशी मागणी न्यायालयाकडे केली. त्यानुसार त्यांना क्लोन कॉपी देण्याचे काम सुरु झाले आहे. पोलिसांनी एकूण 18 इलेक्ट्रॉनिक डिव्हाईसेस जप्त केले आहेत. त्या प्रत्येक डिव्हाईसची क्लोन कॉपी तयार होण्यास सहा तासांचा कालावधी लागतो. याप्रमाणे प्रत्येक डिव्हाईची 9 कॉपी करण्यात येत आहे. 

दरम्यान न्यायालयाकडे आरोपींच्या जामिनाची मागणी करण्यात आली होती. जामिन मिळाल्यानंतरही क्लोनिंगची प्रक्रिया सुरु ठेवावी, असे ऍड. देशमुख यांनी सांगितले.

या प्रकरणाची सुनावणी सध्या विशेष न्यायाधिश आर. एम. पांडे यांच्या न्यायालयात सुरू आहे. सुधीर ढवळे, सुरेंद्र गडलिंग, शोमा शेण, अरुण फरेरा, वर वरा राव, महेश राऊत, व्हर्नोन गोन्सालविस, सुधा भारद्वाज, रोना विल्सन यांना एल्गार परिषद प्रकरणी अटक करण्यात आली आहे. जामिनासाठी अॅड. सिद्धार्थ पाटील, अॅड. राहुल देशमुख आणि अॅड. पार्थ शहा यांच्या वतीने न्यायालयात अर्ज दाखल करण्यात आला आहे.